រដ្ឋាភិបាលអេត្យូពី បានអំពាវនាវឲ្យមានការគាំទ្រពីអន្តរជាតិជាបន្ទាន់ ដើម្បីទប់ស្កាត់ការកើតឡើងនៃជម្លោះ នៅក្នុងតំបន់ Tigray នៅភាគខាងជើងប្រទេសអេត្យូពី ដោយចោទប្រកាន់ក្រុមប្រឆាំងនយោបាយថា បានប្រព្រឹត្ត «ការរំលោភជាច្រើន»នៃកិច្ចព្រមព្រៀងសន្តិភាព ដែលបានបញ្ចប់សង្រ្គាមរយៈពេល ពីរឆ្នាំ។

ទីភ្នាក់ងារព័ត៌មានរដ្ឋអេត្យូពី (ENA) បានរាយការណ៍កាលពីល្ងាចថ្ងៃសុក្រថា រដ្ឋមន្ត្រីការបរទេសអេត្យូពីលោក Gedion Timothewos បានចេញសេចក្តីថ្លែងការណ៍មួយ ចំពេលមានភាពតានតឹងកើនឡើង នៅក្នុងរណសិរ្សរំដោះប្រជាជន Tigray (TPLF) ដែលជាភាគីហត្ថលេខីនៃកិច្ចព្រមព្រៀងបញ្ឈប់អរិភាពជា   អចិន្ត្រៃយ៍ (COHA) ដែលត្រូវបានចុះហត្ថលេខា ក្នុងខែវិច្ឆិកា ឆ្នាំ ២០២២ រួមជាមួយរដ្ឋាភិបាលសហព័ន្ធអេត្យូពី។

ខណៈពេលដែលធ្វើបទសម្ភាសន៍សមាជិកនៃសហគមន៍ការទូត នៅក្នុងទីក្រុងអាឌីស អាបាបា (Addis Ababa) កាលពីថ្ងៃសុក្រ លោក Timothewos បានជំរុញឲ្យសហគមន៍អន្តរជាតិ «ស្វែងយល់ និងបែងចែករវាងអ្នកបំផ្លាញកិច្ចព្រមព្រៀងបញ្ឈប់អរិភាពជាអចិន្ត្រៃយ៍ (COHA) និងអ្នកដែលកំពុងព្យាយាម   អនុវត្តកិច្ចព្រមព្រៀងនេះ ដោយស្មោះត្រង់ និងគាំទ្រដំណើរការឆ្ពោះទៅមុខ»។ នេះបើយោងតាមទីភ្នាក់ងារសារព័ត៌មាន ENA។

អេត្យូពី ជាប្រទេសដែលមានប្រជាជនច្រើនជាងគេទី ២ របស់ទ្វីបអាហ្រ្វិក បានស៊ូទ្រាំនឹងជម្លោះដ៏បំផ្លិចបំផ្លាញរយៈពេល ពីរឆ្នាំ រវាងកងកម្លាំងសម្ព័ន្ធមិត្តរបស់រដ្ឋាភិបាល និងកងកម្លាំងដែលស្មោះត្រង់នឹងរណសិរ្សរំដោះប្រជាជន Tigray (TPLF) ដែលបានផ្ទុះឡើង ក្នុងខែវិច្ឆិកា ឆ្នាំ ២០២០ ដែលបានបណ្តាលឲ្យ មនុស្សរាប់សែននាក់ ស្លាប់ និងរាប់លាននាក់ ត្រូវផ្លាស់ទីលំនៅ។