លោកប្រធានាធិបតីសហរដ្ឋអាមេរិក Donald Trump បាននិយាយកាលពីថ្ងៃចន្ទ ១៧ មីនាថា សមភាគីចិនរបស់លោកគឺលោក Xi Jinping នឹងទៅធ្វើទស្សនកិច្ចនៅសហរដ្ឋអាមេរិកក្នុងពេលឆាប់ៗនេះ     ខណៈភាពតានតឹងពាណិជ្ជកម្មកើនឡើងរវាងប្រទេសមានសេដ្ឋកិច្ចធំជាងគេទាំងពីររបស់ពិភពលោកជុំវិញការដំឡើងពន្ធរបស់លោក Trump ។

លោក Trump បានប្រាប់ក្រុមអ្នកសារព័ត៌មានថា នៅពេលរូបលោកទៅទស្សនាមជ្ឈមណ្ឌល Kennedy សម្រាប់សិល្បៈសម្តែងក្នុងទីក្រុងវ៉ាស៊ីនតោន ខណៈកំពុងនិយាយអំពីមេដឹកនាំចិន ថា លោកនឹងមកក្នុងពេលដ៏ខ្លីខាងមុខ។      លោក Trump ពុំបានផ្តល់ព័ត៌មានលម្អិតបន្ថែមទេ។ 

សារព័ត៌មាន Wall Street Journal បានរាយការណ៍កាលពីសប្តាហ៍មុនថា ទីក្រុងវ៉ាស៊ីនតោន និងទីក្រុងប៉េកាំង បានចាប់ផ្តើមពិភាក្សាអំពីកិច្ចប្រជុំកំពូលដែលអាចកើតមាននៅក្នុងខែមិថុនា នៅសហរដ្ឋអាមេរិក។ មេដឹកនាំទាំងពីរនឹងប្រារព្ធខួបកំណើតនៅខែមិថុនា។ 

ចាប់តាំងពីការវិលត្រឡប់ទៅកាន់សេតវិមានក្នុងខែមករា លោកTrump បានដំឡើងពន្ធលើដៃគូពាណិជ្ជកម្មសំខាន់ៗ រួមមានប្រទេសចិន កាណាដា និងម៉ិកស៊ិក ដោយលើកឡើងពីអតុល្យភាពពាណិជ្ជកម្ម និងការបរាជ័យរបស់ប្រទេសទាំងនោះក្នុងការទប់ស្កាត់លំហូរសារធាតុញៀនហ្វង់តានីល។កាលពីសប្តាហ៍មុន ប្រទេសចិនបានអំពាវនាវឱ្យមានការសន្ទនាជាមួយទីក្រុងវ៉ាស៊ីនតោន។

លោក Trump នៅដើមខែនេះ បានដំឡើងពន្ធ ១០ ភាគរយបន្ថែមលើផលិតផលចិន ឡើងដល់២០ ភាគរយ។ទីក្រុងប៉េកាំងបានឆ្លើយតបដោយការដំឡើងពន្ធរហូតដល់១៥%លើទំនិញកសិកម្មជាច្រើនរបស់សហរដ្ឋអាមេរិក រួមមានសណ្តែកសៀង សាច់ជ្រូក និងសាច់មាន់។

ចិន ដែលជាប្រទេសផលិតដែកថែបលំដាប់កំពូលរបស់ពិភពលោកក៏បានប្តេជ្ញាផងដែរថា ខ្លួននឹងចាត់វិធានការចាំបាច់ទាំងអស់ជាការឆ្លើយតបទៅនឹងការដំឡើងពន្ធថ្មីរបស់សហរដ្ឋអាមេរិក ដាច់ដោយឡែកពីគ្នាលើដែកថែប និងអាលុយមីញ៉ូម៕