ខណៈប្រទេសអ៊ីស្រាអែល បន្តរារាំងការផ្គត់ផ្គង់ជំនួយចូលទៅក្នុងតំបន់ហ្កាហ្សាស្ទ្រីប មូលនិធិកុមាររបស់អង្គការសហប្រជាជាតិ ឬយូនីសេហ្វ(UNICEF) កំពុងអំពាវនាវឱ្យមានការបន្តការដឹកជញ្ជូនជំនួយជាថ្មី និងបទឈប់បាញ់យូរអង្វែងនៅក្នុងតំបន់ហ៊ុមព័ទ្ធមួយនេះ។

ទីភ្នាក់ងារអង្គការសហប្រជាជាតិ បានធ្វើការអំពាវនាវនេះ នៅក្នុងការបង្ហោះតាមបណ្តាញផ្សព្វផ្សាយសង្គម។ ទីភ្នាក់ងារនិយាយថា កុមារមួយលាននាក់នៅតំបន់ហ្កាហ្សា កំពុងតស៊ូដើម្បីរស់រានមានជីវិតដោយគ្មានតម្រូវការចាំបាច់ជាមូលដ្ឋាន ហើយមនុស្សរាប់ម៉ឺននាក់ ខ្វះទឹកស្អាត និងអនាម័យ។

អ៊ីស្រាអែល បានដាក់ការបិទផ្លូវលើការដឹកជញ្ជូនស្បៀងអាហារ និងជំនួយមនុស្សធម៌ផ្សេងទៀតចូលក្នុងតំបន់ហ៊ុមព័ទ្ធមួយនេះកាលពីថ្ងៃទី ២ ខែមីនា ដោយបានដាក់សម្ពាធលើក្រុមហាម៉ាសឲ្យទទួលយកសំណើពីសហរដ្ឋអាមេរិក។ អាមេរិក បានស្នើបន្ថែមពេលបទឈប់បាញ់នៅតំបន់ហ្កាហ្សា រហូតដល់ថ្ងៃទី២០ ខែមេសា ដើម្បីទុកពេលសម្រាប់ការចរចាក្របខ័ណ្ឌសម្រាប់បទឈប់បាញ់អចិន្ត្រៃយ៍ ហើយក៏បានអំពាវនាវឱ្យក្រុមហាម៉ាស ដោះលែងចំណាប់ថ្នូរ ដែលនៅរស់ចំនួន១១នាក់។

ទន្ទឹមនឹងនេះ ក្រុមហាម៉ាស បានរក្សាជំហររបស់ខ្លួនក្នុងការស្វែងរកការផ្លាស់ប្តូរបន្ទាន់ទៅរកបទឈប់បាញ់អចិន្ត្រៃយ៍។ ប្រព័ន្ធផ្សព្វផ្សាយអ៊ីស្រាអែលមួយបានរាយការណ៍កាលពីថ្ងៃចន្ទថា ក្រុមអ្នកចរចារបស់អ៊ីស្រាអែល បានវិលត្រឡប់ពីប្រទេសអេហ្ស៊ីបវិញហើយ ជាប្រទេសអ្នកសម្របសម្រួលសម្រាប់ការចរចារវាងអ៊ីស្រាអែល និងក្រុមហាម៉ាស ហើយសេចក្តីរាយការណ៍បាននិយាយថា គ្មានវឌ្ឍនភាពគួរឱ្យកត់សម្គាល់ណាមួយ ត្រូវបានធ្វើឡើងឡើយក្នុងកិច្ចពិភាក្សានោះ។