ក្រុមនគរបាល និយាយនៅថ្ងៃអង្គារនេះថា ក្រុមអាជ្ញាធរបានដាក់បំរាមគោចរមិនកំណត់នៅតាមតំបន់មួយចំនួនក្នុងទីក្រុង Nagpur ប្រទេសឥណ្ឌា ក្រោយមន្រ្តីនគរបាលរាប់សិបនាក់ រងរបួសក្នុងការប៉ះទង្គិចគ្នាបង្កឡើងដោយសារការទាមទាររបស់ក្រុមហិណ្ឌូឲ្យយកចេញស្តូបរបស់ចក្រពត្តិមូស្លីមសតវត្សរ៍ទី ១៧ Mughal ។

មន្រ្តីនគរបាលមួយរូបដែលសុំមិនបញ្ចេញឈ្មោះ និយាយថា អំពើហិង្សាកាលពីថ្ងៃចន្ទ នៅទីក្រុងភាគកណ្តាល Nagpur បណ្តាលឲ្យរថយន្តជាច្រើនគ្រឿងរងការខូចខាត ហើយមនុស្សជាច្រើននាក់ រងរបួស ក្នុងចំណោមពួកគេមានមន្រ្តីនគរបាលយ៉ាងហោច ១៥នាក់ ហើយមន្រ្តីម្នាក់ស្ថិតក្នុងស្ថានភាពធ្ងន់ធ្ងរ ។

នគរបាលនិយាយនៅក្នុងសេចក្តីថ្លែងការណ៍ថា សមាជិកក្រុមវិស្វហិណ្ឌូបរិស័ទ បានដុតរូបសំណាកចក្រពត្តិមូស្លីម Aurangzeb នៃអាណាចក្រ Mughal ហើយនិងស្តូបរបស់ទ្រង់ ពេលដែលពួកគេស្រែកពាក្យស្លោកទាមទារឲ្យដកចេញពីទីក្រុងជិតខាង Aurangabad ។

នគរបាលនិយាយថា ស្ថានភាពកើនឡើង ក្រោយពេលសមាជិកក្រុមមូស្លីមជាច្រើននាក់ បានដង្ហែក្បួននៅជិតស្ថានីយ៍នគរបាល ហើយនិងបានចោលដុំថ្មលើពួកគេ ។

ទីក្រុង Nagpur គឺជាទីស្នាក់ការកណ្តាលរបស់អង្គការ Rashtriya Swayamsevak Sangh ដែលជាគ្រួសារមេមនោគមវិជ្ជានៃគណបក្ស Bharatiya Janata របស់លោកនាយករដ្ឋមន្រ្តី Narendra Modi ។ ក្រុមវិស្វហិណ្ឌូបរិស័ទ គឺជាគ្រួសារតែមួយរបស់អង្គការមួយនេះ ។

ក្រុមអ្នករិះគន់លោក Modi តែងតែចោទប្រកាន់លោកថា រើសអើងជាមួយជនមូស្លីម ហើយនិងពុំបានចាត់វិធានការប្រឆាំងនឹងអ្នកដែលមានគោលដៅលើពួកគេនោះឡើយ ។ លោក Modi និងរដ្ឋាភិបាលរបស់លោក បានច្រានចោលការចោទប្រកាន់មួយនេះ ៕