អ៊ីស្រាអែល បានបើកការវាយប្រហារតាមផ្លូវអាកាសទូទាំងតំបន់ហ្កាហ្សាស្ទ្រីប នៅព្រឹកថ្ងៃអង្គារនេះ ដោយបានសម្លាប់មនុស្សជាង ៣២០នាក់។ នេះបើយោងតាមក្រសួងសុខាភិបាលហ្កាហ្សា។

ការកើនឡើងភាពតានតឹងនេះ បានបង្កឲ្យមានការថ្កោលទោសទូទាំងពិភពលោក ចំពោះអ្វីដែលត្រូវបានចាត់ទុកថា ជាការវាយប្រហារដ៏ធ្ងន់បំផុតរបស់អ៊ីស្រាអែល នៅក្នុងទឹកដីនេះ ចាប់តាំងពីបទឈប់បាញ់បានចូលជាធរមាន នៅក្នុងខែមករា។

អ្នកសម្របសម្រួលមនុស្សធម៌របស់អង្គការសហប្រជាជាតិសម្រាប់ដែនដីប៉ាឡេស្ទីន ដែលអ៊ីស្រាអែលគ្រប់គ្រងនេះ បានជំរុញឲ្យបទឈប់បាញ់ នៅហ្កាហ្សា ត្រូវបានស្ដារឡើងវិញជាបន្ទាន់។

លោក Muhannad Hadi បាននិយាយនៅក្នុងសេចក្តីថ្លែងការណ៍មួយថា៖«រលកនៃការវាយប្រហារតាមអាកាស បានកើតឡើង នៅទូទាំងតំបន់ហ្កាហ្សា តាំងពីព្រឹកព្រលឹម។ ការវាយប្រហារបែបនេះ គឺគ្មានហេតុផល។ បទឈប់បាញ់ ចាំបាច់ត្រូវតែស្តារឡើងវិញឲ្យបានជាដាច់ខាត។ 

ប្រទេសទួរគី បានថ្កោលទោសការវាយប្រហារដ៏សាហាវរបស់អ៊ីស្រាអែល នៅតំបន់ហ្កាហ្សានេះថា ជា «ដំណាក់កាលថ្មី» នៅក្នុង «គោលនយោបាយប្រល័យពូជសាសន៍» ដោយនិយាយថា រដ្ឋាភិបាលរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ មិនគោរពមនុស្សជាតិ តាមរយៈការបំពានច្បាប់អន្តរជាតិរបស់ខ្លួន។