ភ្នំពេញ ៖ ក្រសួងទេសចរណ៍ សហការជាមួយក្រុមហ៊ុនកូកា-កូឡាកម្ពុជា ក្នុងការបង្កើតវគ្គបណ្តុះបណ្តាល ដើម្បីត្រៀម​រៀបចំ ទទួលទេសចរណ៍វ៉ាក់សាំង អនាម័យ និងបដិសណ្ឋារកិច្ចភ្ញៀវដល់អាជីវករ​ នៅក្នុងខេត្ត​ព្រះសីហនុ។

ក្រសួងទេសចរណ៍ សហការជាមួយក្រុមហ៊ុនកូកា-កូឡាកម្ពុជា រៀបចំនិងឧបត្ថម្ភ​ដល់​វគ្គបណ្តុះ​បណ្តាល ដើម្បីត្រៀមរៀបចំទទួលទេសចរណ៍វ៉ាក់សាំង អនាម័យ និងបដិសណ្ឋារកិច្ចភ្ញៀវដល់អាជីវករ នៅក្នុងខេត្តព្រះសីហនុ ដែលរៀបចំផ្តួចផ្តើមដោយក្រសួងទេសចរណ៍​ និងគាំទ្រផ្សព្វផ្សាយ​ដោយសារ​ព័ត៌មាន ដោយមានការចូលរួមពីលោក​​ តាំង សុចិត្តគ្រឹស្នា ប្រធាន​មន្ទីរទេសចរណ៍​ខេត្តព្រះសីហនុ​និងកញ្ញា សម្បត្តិ មុនីវរលក្ខណ៍ នាយកផ្នែកទំនាក់ទំនងកិច្ចការសាធារណៈ នៃក្រុមហ៊ុនកូកា-កូឡាកម្ពុជា និងមន្រ្តីសាលាខេត្តនៅព្រឹកថ្ងៃទី២៦ ខែវិច្ឆិកា ឆ្នាំ២០២១ នៅក្នុង​សាលា​ខេត្តព្រះសីហនុ។

វគ្គបណ្តុះបណ្តាលនេះ ធ្វើឡើងក្នុងគោលដៅរួមចំណែកបង្កឱ្យមានភាពកាន់ប្រសើរឡើង ក្នុង​សេវា​ម្ហូបអាហារ និងបដិសណ្ឋារកិច្ចត្រៀមទទួលភ្ញៀវទេសចរណ៍ជាតិ និងអន្តរជាតិជាពិសេស​ក្នុង​បរិបទ​ដែលចាំបាច់នៅតែបន្តការការពារនូវការរីករាលដាលជំងឺកូវីដ-១៩។ វគ្គបណ្តុះបណ្តាលនេះ មានខ្លឹមសារ​សម្រាប់ការត្រៀមរៀបចំទទួលទេសចរណ៍វ៉ាក់សាំង និងការបណ្តុះបណ្តាលផ្នែកបដិ-សណ្ឋារកិច្ច ការទទួលភ្ញៀវ អនាម័យចំណីអាហារ​ ការរៀបចំកន្លែងលក់ ការរៀបចំខ្លួនក្នុងនាមជាអ្នកលក់ និងការ​គ្រប់គ្រងបែងចែកសំណល់។

កញ្ញា សម្បត្តិ មុនីវរលក្ខណ៍ បានលើកឡើងថា៖ ខេត្តព្រះសីហនុពិតជាមាន​សក្តានុពលខ្លាំង​ក្នុង​វិស័យទេសចរណ៍ ហើយវគ្គបណ្តុះបណ្តាលនេះដែរគឺពិតជាមានអត្ថប្រយោជន៍ណាស់សម្រាប់បងប្អូន​អាជីវករ​​ព្រោះថា នៅពេលដែលពួកគាត់​បានយល់ដឹងច្បាស់លាស់អំពីការអនុវត្តវិធាន​សុវត្ថិភាព​អនាម័យ​ម្ហូបអាហារក្នុងវិស័យទេសចរណ៍ ការរៀបចំទីកន្លែងលក់ឱ្យមានអនាម័យ និងការធ្វើបដិសណ្ឋារកិច្ច នឹងរួមចំណែកលើកស្ទួយវិស័យទេសចរណ៍​​ ដែលចាំបាច់មានការសហការពីបងប្អូនអាជីវករ។

គួរបញ្ជាក់ផងដែរថា វគ្គបណ្តុះបណ្តាលនេះ ជាវគ្គបណ្តុះបណ្តាលលើកទី៥ ដែលក្រុមហ៊ុនកូកា-កូឡាកម្ពុជា បានសហការរៀបចំ​​ជាមួយក្រសួងទេសចរណ៍ ដោយវគ្គបណ្តុះបណ្តាលចំនួន៤មុន ប្រារព្ធនៅខេត្តបាត់ដំបង ខេត្តកំពង់ធំ ខេត្តកោះកុង និង ខេត្តកែបរួចមកហើយ។ វគ្គបណ្តុះ​បណ្តាលនេះ​គឺជា​គំនិតផ្តួចផ្តើមមួយ ដើម្បីលើកកម្ពស់ស្ត្រីដែលជាសសរស្តម្ភមួយ ក្នុងចំណោមសសរស្តម្ភទាំង៥ គឺ១.ពិភពលោកគ្មានសម្រាម, ២.ទឹក, ៣.ការលើកកម្ពស់ស្ត្រី, ៤.អាកាសធាតុ និង៥.សុខុមាលភាព​សហគមន៍ដោយឈរលើគោលបំណងបង្កើតភាពស្រស់ស្រាយដល់ពិភពលោក និងបង្កើតភាព​ខុសគ្នា​ជាវិជ្ជមាន៕អត្ថបទ ៖ រដ្ឋា