សហព័ន្ធកាកបាទក្រហមអន្តរជាតិ IFRC បានព្រមាននៅក្នុងសេចក្ដីថ្លែងការណ៍មួយកាលពីថ្ងៃអង្គារ (១៨ មីនា) ថា សេវាវេជ្ជសាស្រ្តនៅដែនដីហ្កាហ្សា កំពុងរងសម្ពាធកាន់តែខ្លាំង ខណៈក្រុមគ្រូពេទ្យ និងក្រុមវេជ្ជសាស្រ្ដសង្គ្រោះបន្ទាន់មកពីអឌ្ឍចន្ទក្រហមប៉ាឡេស្ទីន បាននិងកំពុងឆ្លើយតបយ៉ាងសស្រាក់សស្រាំនៅតំបន់ហ៊ុមព័ទ្ធមួយនេះ បន្ទាប់ពីការវាយប្រហារតាមអាកាសដ៏បង្ហូរឈាមពេញមួយយប់ពីសំណាក់អ៊ីស្រាអែល ដែលបានសម្លាប់មនុស្សជាង ៤០០នាក់ នេះបើយោងតាមតួលេខប៉ាឡេស្ទីន។

IFRC បន្តថា នៅតំបន់ហ្កាហ្សា ក្រុមការងារអឌ្ឍចន្ទក្រហមប៉ាឡេស្ទីនបានឆ្លើយតបទៅនឹងអ្នកស្លាប់ និងរបួសរាប់រយនាក់ ហើយមានស្ត្រី និងកុមារ ជាច្រើនស្ថិតក្នុងចំណោមជនរងគ្រោះទាំងនោះ។ តំបន់ជុំវិញនៃទីក្រុងហ្កាហ្សា ទីក្រុងរ៉ាហ្វា និង ខាន់យូនីស ជាទីតាំងដែលរងគ្រោះខ្លាំងជាងគេបំផុត ដោយមើលឃើញការបំផ្លិចបំផ្លាញយ៉ាងទូលំទូលាយ។

កាកបាទក្រហម IFRC សង្កត់ធ្ងន់ថា រយៈពេល ១៦ខែចុងក្រោយនេះ បានធ្វើឱ្យសេវាសុខាភិបាលរបស់ហ្កាហ្សា រងការខូចខាតយ៉ាងធ្ងន់ធ្ងររួចទៅហើយ ខណៈពុំមានជំនួយមនុស្សធម៌បានចូលទៅដែនដីនេះទេក្នុងរយៈពេល ១៧ថ្ងៃចុងក្រោយ មុនឈានដល់ការវាយប្រហារទ្រង់ទ្រាយធំឡើងវិញ ដោយនេះរួមបញ្ចូលទាំងការផ្គត់ផ្គង់ផ្នែកវេជ្ជសាស្រ្ត ថ្នាំ និងប្រេងឥន្ធនៈ។

លើសពីនេះ IFRC បញ្ជាក់ថា ពុំមានស្បៀងអាហារ ទឹក ភួយ សម្លៀកបំពាក់ តង់ និងការផ្គត់ផ្គង់ជំនួយសំខាន់ៗផ្សេងទៀតចូល០២ ខែមីនា មក។ ទីភ្នាក់ងារអន្តរជាតិមួយនេះអំពាវនាវឱ្យបញ្ចប់អរិភាព ដោយសារតែអំពើហិង្សាជាថ្មីបានបង្កនូវគ្រោះថ្នាក់ និងការឈឺចាប់កាន់តែខ្លាំង ដែលធ្វើអោយការរស់រានមានជីវិតកាន់តែពិបាកសម្រាប់ប្រជាជនហ្កាហ្សា៕