ការិយាល័យរបស់ប្រមុខសិទ្ធិមនុស្សអង្គការសហប្រជាជាតិ បាននិយាយកាលពីថ្ងៃអង្គារ (១៨ មីនា) ថា អ៊ីស្រាអែលបាននឹងកំពុងពង្រីក និងបង្រួបបង្រួមការតាំងលំនៅក្នុងតំបន់ West Bank ដែលខ្លួនកាន់កាប់ ដោយនេះជាផ្នែកមួយនៃប្រតិបត្តិការធ្វើសមាហរណកម្មយ៉ាងមានស្ថិរភាពនៃទឹកដីទាំងនេះដាក់បញ្ជូលទៅក្នុងរដ្ឋអ៊ីស្រាអែល ដោយបំពានច្បាប់អន្តរជាតិ។

របាយការណ៍ ដែលផ្អែកលើការស្រាវជ្រាវនៅចន្លោះថ្ងៃទី០១ ខែវិច្ឆិកា ឆ្នាំ២០២៣ និងថ្ងៃទី ៣១ ខែតុលា ឆ្នាំ២០២៤ បាននិយាយថា មានការពង្រីក "ដ៏ធំ" នៃការតាំងទីលំនៅរបស់អ៊ីស្រាអែល នៅតំបន់កាន់កាប់ West Bank រួមទាំងនៅទីក្រុងហ្សេរុយសាឡិមខាងកើត ហើយបានដកស្រង់របាយការណ៍ដោយអង្គការមិនមែនរដ្ឋាភិបាលជាច្រើនរបស់អ៊ីស្រាអែលនៃលំនៅដ្ឋានដែលបានគ្រោងទុករាប់ម៉ឺនខ្នង នៅក្នុងការតាំងទីលំនៅថ្មី ឬមានស្រាប់។

ការរកឃើញនេះនឹងត្រូវបង្ហាញដល់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិក្នុងខែនេះ ហើយបានកើតឡើងស្របពេលពលរដ្ឋប៉ាឡេស្ទីនកាន់តែភ័យខ្លាចថា អ៊ីស្រាអែលអាចដាក់បញ្ចូលដែនដី West Bank ទៅក្នុងទឹកដីរបស់ខ្លួន ខណៈគោលនយោបាយសហរដ្ឋអាមេរិក មានការផ្លាស់ប្តូរនៅក្រោមលោកប្រធានាធិបតី Donald Trump ហើយកន្លែងតាំងលំនៅថ្មីជាច្រើនត្រូវបានបង្កើតឡើងនៅក្នុងតំបន់ West Bank ដែលត្រូវមើលឃើញថាជាផ្នែកមួយនៃរដ្ឋប៉ាឡេស្ទីននាពេលអនាគត។

ប្រមុខសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយនៅក្នុងសេចក្តីថ្លែងការណ៍មួយ អមជាមួយរបាយការណ៍នេះថា "ការផ្ទេរផ្នែកខ្លះនៃប្រជាជនស៊ីវិលរបស់អ៊ីស្រាអែល ចូលទៅក្នុងទឹកដីដែលខ្លួនកាន់កាប់ គឺស្មើនឹងឧក្រិដ្ឋកម្មសង្រ្គាម" ដោយជំរុញឱ្យសហគមន៍អន្តរជាតិចាត់វិធានការបន្ទាន់ប្រកបដោយអត្ថន័យដើម្បីទប់ស្កាត់រឿងនេះ៕