រដ្ឋាភិបាលអ៊ីស្រាអែល បានអនុម័តសំណើរបស់លោកនាយករដ្ឋមន្ត្រី Benjamin Netanyahu ក្នុងការតែងតាំងលោក Itamar Ben-Gvir ជារដ្ឋមន្ត្រីសន្តិសុខជាតិជាថ្មីឡើងវិញ នេះបើយោងតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីនៅថ្ងៃពុធ (១៩ មីនា) នេះ ខណៈជម្លោះហ្កាហ្សាកាន់តែតានតឹង ជាមួយនឹងការវាយប្រហារតាមអាកាសយ៉ាងបង្ហូរឈាម។

ការប្រកាសតែងតាំងលោក Ben-Gvir វ័យ ៤៨ឆ្នាំ ដែលធ្លាប់ជាសមាជិកគណៈរដ្ឋមន្ត្រីស្តាំនិយមប្រកាន់ជំហរតឹងរបស់លោក Netanyahu បានធ្វើឡើងបន្ទាប់ពីការវាយប្រហារសម្លាប់មនុស្សរាប់រយនាក់របស់អ៊ីស្រាអែលលើតំបន់ហ្កាហ្សា ដែលបានបញ្ចប់ភាពស្ងប់ស្ងាត់ជាច្រើនសប្តាហ៍ បន្ទាប់ពីកិច្ចពិភាក្សាជាមួយប៉ាឡេស្ទីន បានជាប់គាំងលើបទឈប់បាញ់អចិន្រ្តៃយ៍។

គួររម្លឹកថា កាលពីខែមករា លោក Ben-Gvir បានលាលែងពីតំណែងរដ្ឋមន្ត្រីសន្តិសុខជាតិរបស់រដ្ឋាភិបាលអ៊ីស្រាអែល ដោយសារការខ្វែងគំនិតគ្នាលើបទឈប់បាញ់។ ការវិលត្រឡប់នេះ ជាការពង្រឹងក្រុមចម្រុះសំឡេងភាគច្រើនស្ដួចស្ដើងនៅក្នុងសភារបស់លោក Netanyahu។

ពេលនៅក្នុងគណៈរដ្ឋមន្ត្រី លោក Ben-Gvir តែងរិះគន់ម្តងហើយម្តងទៀតលើកងទ័ព និងលើលោក Netanyahu ជុំវិញសង្រ្គាមហ្កាហ្សា ដោយប្រឆាំងនឹងកិច្ចព្រមព្រៀងណាមួយជាមួយក្រុមហាម៉ាស និងជួនកាលគំរាមទម្លាក់រដ្ឋាភិបាល ប្រសិនបើខ្លួនធ្វើកិច្ចព្រមព្រៀងបញ្ចប់សង្រ្គាមហ្កាហ្សា ដោយមិនបំផ្លាញក្រុមហាម៉ាសជាមុន៕