អង្គការទេសន្តរប្រវេសន៍អន្តរជាតិ (IOM) បាននិយាយកាលពីថ្ងៃអង្គារថា ការកើនឡើងនៃអំពើហិង្សា នៅទីក្រុងព័រអូប្រាំង ( Port-au-Prince) រដ្ឋធានីនៃប្រទេសហៃទី បានបង្ខំប្រជាជនជិត ៦០.000នាក់ ឲ្យភៀសខ្លួន ចេញពីផ្ទះសម្បែងរបស់ពួកគេ កាលពីខែមុន។ 

អង្គការ IOM បាននិយាយនៅក្នុងសេចក្តីថ្លែងការណ៍មួយថា៖«អំពើហិង្សាដែលបង្កឡើងក្រុមជនអន្ធពាល ការជម្លៀសប្រជាជន និងអស្ថិរភាព បានញាំញីទីក្រុងព័រអូប្រាំង និងមួយភាគធំនៃប្រទេសនេះ អស់រយៈពេលជាច្រើនឆ្នាំ ដោយរលកនៃការវាយប្រហារជាបន្តបន្ទាប់ ធ្វើឲ្យស្ថានភាពកាន់តែអាក្រក់ឡើងៗ នៅក្នុងសហគមន៍ ដែលងាយរងគ្រោះរួចហើយនោះ»។

អង្គការនេះ បានបន្ថែមថា ស្ថានភាពសន្តិសុខ កាន់តែយ៉ាប់យ៉ឺនខ្លាំង ក្នុងរយៈពេលប៉ុន្មានខែថ្មីៗនេះ ដោយសារការកើនឡើងនៃការវាយប្រហារប្រឆាំងនឹងជនស៊ីវិល កំពុងបំផ្លាញតំបន់ ដែលគ្មានក្រុមជនអន្ធពាល ដែលនៅសល់មួយចំនួន។

ឥឡូវនេះ មនុស្សជាង ១លាននាក់ ត្រូវបានផ្លាស់ទីលំនៅ នៅទូទាំងប្រទេសហៃទី ជាតួលេខមួយដែលបានកើនឡើង ៣ដង កាលពីឆ្នាំមុន។

លោក Gregoire Goodstein ប្រធានបេសកកម្មរបស់អង្គការ IOM នៅប្រទេសហៃទី បាននិយាយថា៖     «ការកើនឡើងនៃការផ្លាស់ទីលំនៅនេះ បង្ហាញពីវដ្តនៃអំពើហិង្សាឥតឈប់ឈរ ដែលបានបំផ្លិចបំផ្លាញរដ្ឋធានីនេះ»។«យើងមិនដែលឃើញការជម្លៀសប្រជាជនទ្រង់ទ្រាយធំបែបនេះ ក្នុងរយៈពេលដ៏ខ្លីបែបនេះទេ»។