ចៅក្រមសហព័ន្ធ កាលពីថ្ងៃអង្គារ (ទី១៨ មីនា) បានរារាំងលោកមហាសេដ្ឋី Elon Musk និងក្រសួងប្រសិទ្ធភាពរដ្ឋាភិបាល (DOGE) របស់លោក មិនឲ្យចាត់វិធានការបន្ថែមទៀត ដើម្បីបិទទីភ្នាក់ងារ សម្រាប់ការអភិវឌ្ឍអន្តរជាតិសហរដ្ឋអាមេរិក (USAID) ដោយលើកឡើងថា កិច្ចប្រឹងប្រែងរបស់ពួកគេ ដើម្បីបិទទីភ្នាក់ងារនេះទំនងជាបំពានរដ្ឋធម្មនុញ្ញរបស់សហរដ្ឋអាមេរិក។

នៅក្នុងសេចក្តីសម្រេចបឋម ចៅក្រមសហព័ន្ធប្រចាំតំបន់របស់អាមេរិក លោក Theodore Chuang ក្នុងរដ្ឋ Maryland បានបញ្ជាឲ្យទីប្រឹក្សារបស់លោកប្រធានាធិបតី Donald Trump គឺលោក Musk និង DOGE ស្ដារឲ្យមានការចូលប្រើប្រាស់បានវិញនូវប្រព័ន្ធកុំព្យូទ័ររបស់ USAID សម្រាប់បុគ្គលិកផ្ទាល់ និងបុគ្គលិកជាប់កិច្ចសន្យារបស់ទីភ្នាក់ងារ ក្នុងនោះរួមទាំងមនុស្សរាប់ពាន់នាក់ដែលត្រូវបានឲ្យឈប់សម្រាកផងដែរ។

សេចក្តីសម្រេចនេះ បានកើតមានឡើង ដើម្បីឆ្លើយតបទៅនឹងបណ្តឹងរបស់និយោជិតទាំងបច្ចុប្បន្ន និងអតីត ដែលបច្ចុប្បន្នកំពុងរង់ចាំការរុះរើយ៉ាងឆាប់រហ័សនៃទីភ្នាក់ងារជំនួយបរទេស។ សេតវិមានមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងសេចក្ដីសម្រេចរបស់ចៅក្រមនេះ៕