រដ្ឋមន្រ្តីការបរទេស Marco Rubio កាលពីថ្ងៃអង្គារ(ទី១៨ ខែមីនា) បានគំរាមដាក់ទណ្ឌកម្មបន្ថែមទៀតលើវេណេស៊ុយហ្ស៊ុយឡា ប្រសិនបើប្រទេសនេះ មិនទទួលយកពលរដ្ឋរបស់ខ្លួនដែលត្រូវបានធ្វើមាតុភូមិនិវត្តន៍ពីសហរដ្ឋអាមេរិកទេនោះ។

តាមរយៈសារបង្ហោះនៅលើបណ្ដាញសង្គម X លោក Rubio បានប្រាប់ថា៖ «ប្រសិនបើរបបរបស់លោក Nicolas Maduro មិនទទួលយកលំហូរនៃជើងហោះហើរនិរទេស ដោយមានលេស ឬការពន្យារពេលបន្ថែមទៀតនោះ សហរដ្ឋអាមេរិកនឹងដាក់ទណ្ឌកម្មថ្មី ធ្ងន់ធ្ងរ និងតឹងរ៉ឹងខ្លាំងជាងមុន»។

ក្រសួងទំនាក់ទំនងវេណេស៊ុយហ្ស៊ុយឡា មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយទេ។ លោកប្រធានាធិបតី Maduro និងរដ្ឋាភិបាលរបស់លោក តែងតែបដិសេធការដាក់ទណ្ឌកម្មដោយសហរដ្ឋអាមេរិក និងប្រទេសដទៃទៀត ដោយលើកឡើងថា នោះគឺជាវិធានការខុសច្បាប់ដែលស្មើនឹងបង្កើត «សង្គ្រាមសេដ្ឋកិច្ច" ដែលត្រូវបានរៀបចំឡើង ដើម្បីបន្ទច់បង្អាក់ភាពលូតលាស់ប្រទេសវេណេហ្ស៊ុយអេឡា។

លោក Maduro និងសម្ព័ន្ធមិត្តរបស់លោក បានអបអរសាទរនូវអ្វីដែលពួកលោកនិយាយថា ជាភាពធន់របស់ប្រទេសនេះ បើទោះបីជាមានវិធានការនេះក៏ដោយ៕