រដ្ឋាភិបាលជិតផុតអាណត្តិរបស់ប្រទេសអាល្លឺម៉ង់ បានព្រមព្រៀងបញ្ចេញជំនួយយោធាបន្ថែមចំនួន ៣ពាន់លានអឺរ៉ូ (៣,៣ពាន់លានដុល្លារ) សម្រាប់អ៊ុយក្រែន នៅឆ្នាំនេះ បន្ទាប់ពីសមាជិកសភា បានអនុម័តផែនការ សម្រាប់គោលនយោបាយសើរើសារពើពន្ធ។ នេះបើយោងតាមការបង្ហាញនៅក្នុងឯកសាររបស់ក្រសួងហិរញ្ញវត្ថុដែលសារព័ត៌មាន Reuters បានឃើញ នៅថ្ងៃពុធ (ទី១៩ ខែមីនា)។

ចំណាត់ការនេះត្រូវបានគេមើលឃើញយ៉ាងទូលំទូលាយថា ជាការទម្លាយភាពទាល់ច្រកមួយ បន្ទាប់ពីអធិការបតីជិតផុតតំណែង លោក Olaf Scholz បានទទូចថា ការបន្ធូរបន្ថយច្បាប់កម្ចី គឺជាតម្រូវការត្រូវធ្វើ មុនមានជំនួយបន្ថែម។

នៅពេលដែលភាពមិនប្រាកដប្រជា មានកាន់តែខ្ពស់ ជុំវិញអនាគតនៃការធានាសន្តិសុខរបស់សហរដ្ឋអាមេរិក ក្រោមការដឹកនាំរបស់ប្រធានាធិបតី លោក Donald Trump រដ្ឋនានា នៅអឺរ៉ុប កំពុងស្ថិតនៅក្រោមសម្ពាធកាន់តែខ្លាំងឡើងៗ ដើម្បីបង្ហាញពីការប្តេជ្ញាចិត្តរបស់ពួកគេ ចំពោះអ៊ុយក្រែន ក្នុងសង្រ្គាមរបស់ប្រទេសនេះ ជាមួយរុស្ស៊ី រួមទាំងការចំណាយផ្នែកយោធាផងដែរ។

នៅក្នុងឯកសារដែលដាក់បញ្ជូនទៅកាន់គណៈកម្មាធិការពីក្រសួងហិរញ្ញាវត្ថុ រដ្ឋមន្ត្រីរបស់ក្រសួងនេះ លោក Joerg Kukies បានជូនដំណឹងដល់គណៈកម្មាធិការថវិការបស់សភាថា តម្រូវការ ដើម្បីអនុញ្ញាតឲ្យផ្តល់មូលនិធិបន្ថែម ត្រូវបានបំពេញ។

នៅក្នុងលិខិតនោះ ក្រសួងបានយល់ព្រមលើការចំណាយបន្ថែមចំនួន ២,៥៤៧ពាន់លានអឺរ៉ូ សម្រាប់ឆ្នាំនេះ។ រួមជាមួយនឹងចំនួនទឹកប្រាក់ផ្សេងទៀត ដែលមានទាំងសំណងពីមូលនិធិសន្តិភាពអឺរ៉ុបផងដែរនោះ ជារួម អាល្លឺម៉ង់នឹងមាន ៣ពាន់លានអឺរ៉ូ៕