បណ្ដាអ្នកវិភាគបានលើកឡើងថា ប្រធានាធិបតីរុស្ស៊ី លោក Vladimir Putin បានខិតកាន់តែកៀកទៅគោលដៅរបស់លោកក្នុងការជួសជុលទំនាក់ទំនងរបស់រុស្ស៊ី ជាមួយសហរដ្ឋអាមេរិក និងជំរុញឱ្យមានជម្លោះរវាងទីក្រុងវ៉ាស៊ីនតោន និងប្លុកអឺរ៉ុប ខណៈប្រធានាធិបតីអាមេរិក លោក Donald Trump ស្វែងរកបានវឌ្ឍនភាពតិចតួចប៉ុណ្ណោះក្នុងការរួមចំណែកដល់កិច្ចខិតខំប្រឹងប្រែងសន្តិភាពនៅអ៊ុយក្រែន ដែលហាក់បង្ហាញពីជំហានថយក្រោយដ៏បរាជ័យ។

មុនពេលកិចុ្ចសន្ទនាតាមទូរសព្ទជាង ១ម៉ោងកន្លះកាលពីថ្ងៃអង្គារសប្ដាហ៍នេះរវាងប្រធានាធិបតីទាំងពីរ ភាគីអាមេរិកបាននិយាយថា ខ្លួននឹងស្វះស្វែងរកការព្រមព្រៀងពីរុស្ស៊ី លើបទឈប់បាញ់ ៣០ថ្ងៃក្នុងសង្គ្រាម ដែលអ៊ុយក្រែនបានទទួលយកជាគោលការណ៍រួចទៅហើយ ហើយនឹងក្លាយជាជំហានដំបូងឆ្ពោះទៅរកកិច្ចព្រមព្រៀងសន្តិភាពពេញលេញ។

ផ្ទុយទៅវិញ លោក Putin បានយល់ព្រមត្រឹមតែបទឈប់បាញ់ដ៏តូចចង្អៀតមួយប៉ុណ្ណោះ ដែលរុស្ស៊ី និងអ៊ុយក្រែន នឹងឈប់វាយប្រហាររោងចក្រថាមពលរបស់គ្នាទៅវិញទៅមករយៈពេលមួយខែ។ ក្នុងជំហាននេះ លោក Putin ចង់ធានាថា លោក Trump មិនទៅដោយដៃទទេនោះទេ ហើយនេះគឺជាលើកទីមួយហើយក្នុងសង្គ្រាមជាង ៣ឆ្នាំ ដែលភាគីទាំងពីរត្រូវបានបញ្ចុះបញ្ចូលឱ្យកាត់បន្ថយអរិភាព សូម្បីតែក្នុងរយៈពេលខ្លីក៏ដោយ។

ប៉ុន្តែសម្រាប់ពេលនេះ រុស្ស៊ីមានសេរីភាពក្នុងការបន្តប្រតិបត្តិការយោធាលើសមរភូមិ ជាពិសេសនៅតំបន់ Kursk ភាគខាងលិចរបស់ខ្លួន ជាទីដែលរុស្ស៊ីជិតនឹងបណ្តេញកងកម្លាំងអ៊ុយក្រែនចេញអស់។ អ្នកជំនាញនិយាយថា លោក Putin ហាក់ច្រានចោលបទឈប់បាញ់នេះប្រកបដោយប្រសិទ្ធភាព ហើយទំនងជាមិនពិចារណាហ្មត់ចត់លើរឿងនេះទេ លុះត្រាលោក Trump បង្កើនសម្ពាធសេដ្ឋកិច្ច ជាមួយនឹងការដាក់ទណ្ឌកម្មបន្ថែម។ ទោះជាយ៉ាងនេះក្ដី ក្រុមមន្រ្តីជំនិតរបស់លោក Trump បានហៅកិច្ចសន្ទនាតាមទូរសព្ទនោះថាជាជោគជ័យ និងជាជំហានដ៏សំខាន់ឆ្ពោះទៅរកបទឈប់បាញ់៕