ប្រជាជនហៃទីនៅក្នុងរដ្ឋធានី Port-au-Prince (ព័រអូប្រាំង) បាននាំគ្នាតវ៉ា កាលពីថ្ងៃពុធ (ទី១៩ ខែមីនា) ប្រឆាំងនឹងស្ថានភាពអសន្តិសុខដែលអូសបន្លាយពេលដ៏យូរ ដោយសារក្រុមអន្ធពាលបានចូលកាន់កាប់តំបន់ដ៏ធំរបស់ទីក្រុង និងបង្ខំឲ្យមនុស្សជាច្រើនផ្លាស់ទីលំនៅ។

ក្រុមបាតុករ ក្នុងនោះរួមមានទាំងជនភៀសខ្លួនហៃទីផងដែរ បានដាក់របាំងនៅតាមដងផ្លូវ ទាមទារឲ្យមានវិធានការបន្ទាន់ ដើម្បីប្រយុទ្ធប្រឆាំងនឹងស្ថានភាពអសន្តិសុខ និងឲ្យមានការលាលែងពីតំណែងរបស់សមាជិកក្រុមប្រឹក្សានៃប្រធានាធិបតីអន្តរកាល។ យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា យ៉ាងហោចណាស់មនុស្ស ២នាក់ បានរងរបួស ក្នុងអំឡុងពេលតវ៉ានោះ។

គួរបញ្ជាក់ថា សម្ព័ន្ធក្រុមអន្ធពាល Viv Ansanm បាននិងកំពុងបង្កើនអំពើហិង្សា ចាប់តាំងពីកងកម្លាំងសន្តិសុខរដ្ឋាភិបាល ក្នុងខែនេះ បានចាប់ផ្តើមវាយប្រហារក្រុមអន្ធពាល ដោយប្រើប្រាស់យានដ្រូនដែលមានផ្ទុកសារធាតុផ្ទុះ។

រដ្ឋាភិបាលរបស់ប្រទេសហៃទី ដែលបានអំពាវនាវឲ្យមានការគាំទ្រផ្នែកសន្តិសុខអន្តរជាតិជាបន្ទាន់ ចាប់តាំងពីឆ្នាំ២០២២ ថ្មីៗនេះ បានស្នើសុំបេសកកម្មរក្សាសន្តិភាពជាផ្លូវការរបស់អង្គការសហប្រជាជាតិ ដើម្បីបង្កើនចំនួននគរបាលដែលមិនមានបុគ្គលិកគ្រប់គ្រាន់ ប៉ុន្តែសំណើនោះត្រូវបានជំទាស់ដោយរុស្ស៊ី និងចិន។

គួរបញ្ជាក់ថា មនុស្សជាង ៤២.០០០នាក់ ត្រូវបានបង្ខំឲ្យភៀសខ្លួនចេញពីផ្ទះសម្បែងរបស់ពួកគេ នៅត្រឹមតែចន្លោះពាក់កណ្តាលខែកុម្ភៈ ដល់ដើមខែមីនាប៉ុណ្ណោះ ហើយចំនួនមនុស្សដែលបម្លាស់លំនៅក្នុងប្រទេសខ្លួនឯង ដោយសារអំពើហិង្សា បានកើនឡើងលើស ១លាននាក់៕