តម្លៃប្រេងបានហក់ឡើង អំឡុងការជួញដូរដំបូង នៅថ្ងៃព្រហស្បតិ៍ (ទី២០ ខែមីនា) នេះ ដោយសារការធ្លាក់ចុះនូវស្តុកប្រេងរបស់សហរដ្ឋអាមេរិក និងការកើនឡើងនូវភាពតានតឹង នៅតំបន់មជ្ឈិមបូព៌ា។

តម្លៃប្រេងឆៅ Brent បានឡើងថ្លៃ ៤០សេន ឬ ០,៥៧ភាគរយ ដោយឡើងដល់ ៧១,១៨ដុល្លារ ក្នុងមួយបារ៉ែល គិតត្រឹមម៉ោង ២:១៣នាទី ម៉ោងសកល ខណៈប្រេងឆៅ West Texas Intermediate (WTI) របស់អាមេរិក បានឡើង ៣៤សេន ឬ ០,៣១ភាគរយ ពោលគឺឡើងដល់ ៦៧,៥០ដុល្លារ ក្នុងមួយបារ៉ែល។

តម្លៃប្រេងបានហក់ឡើងបន្ទាប់ពីទិន្នន័យរបស់រដ្ឋាភិបាលសហរដ្ឋអាមេរិក បានបង្ហាញពីការធ្លាក់ចុះខ្ពស់ជាងការរំពឹងទុក នៅក្នុងសារពើភ័ណ្ឌប្រេងចម្រាញ់ សម្រាប់សប្តាហ៍មុន។ សារពើភ័ណ្ឌប្រេងចម្រាញ់ ដែលរួមមានប្រេងម៉ាស៊ូត និងប្រេងកំដៅ បានធ្លាក់ចុះ ២,៨លានបារ៉ែល កាលពីសប្តាហ៍មុន ដោយមានចំនួនច្រើនជាងការរំពឹងទុកនៃការធ្លាក់ចុះ ៣០០.០០០បារ៉ែល នៅក្នុងការស្ទង់មតិរបស់សារព័ត៌មាន Reuters។

ហានិភ័យឡើងតម្លៃខ្ពស់ជាសកល បានកើនឡើង បន្ទាប់ពីអ៊ីស្រាអែល បានចាប់ផ្តើមប្រតិបត្តិការជើងគោកថ្មី កាលពីថ្ងៃពុធ (ទី១៩ ខែមីនា) នៅក្នុងតំបន់ហ្កាហ្សា ក្រោយបានរំលោភបំពានបទឈប់បាញ់ដែលមានរយៈពេលជិត ២ខែ។

ដូចគ្នានេះដែរ សហរដ្ឋអាមេរិក បានបន្តការវាយប្រហារតាមផ្លូវអាកាសទៅលើគោលដៅរបស់ក្រុមហ៊ួទី ក្នុងប្រទេសយេម៉ែន ដែលជាការសងសឹក ចំពោះការវាយប្រហាររបស់ក្រុមនោះលើនាវានៅសមុទ្រក្រហម។ ហើយប្រធានាធិបតីអាមេរិក លោក Donald Trump ក៏បានប្ដេជ្ញាឲ្យអ៊ីរ៉ង់ទទួលខុសត្រូវ ចំពោះការវាយប្រហាររបស់ក្រុមហ៊ួទី នាពេលខាងមុខ៕