នៅក្នុងឱកាសអបអរសាទរខួបលើកទី៤៥ នៃការដាក់ឱ្យចរាចរប្រាក់រៀលឡើងវិញ (២០ មីនា ឆ្នាំ១៩៨០ - ២០ មីនា ឆ្នាំ២០២៥) នៅថ្ងៃទី២០ ខែមីនា ឆ្នាំ២០២៥នេះ សភានៃព្រះរាជាណាចក្រកម្ពុជាមាន រដ្ឋសភានិងព្រឹទ្ធសភា សហការជាមួយធនាគារជាតិនៃកម្ពុជា បានរៀបចំសិក្ខាសាលា ផ្សព្វផ្សាយស្តីពីប្រាក់រៀល ប្រព័ន្ធបាគង និងខេអេចឃ្យូអរ (KHQR) ។

សិក្ខាសាលាបានប្រារព្ធធ្វើនៅវិមានរដ្ឋសភាក្រោមអធិបតីដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភាតំណាងដ៏ខ្ពង់ខ្ពស់សម្តេចមហារដ្ឋសភាធិកាធិបតី ឃួន សុដារី ប្រធានរដ្ឋសភា។

ក្នុងនាមសម្ដេចប្រធានរដ្ឋសភា ឯកឧត្តមកិត្តិសេដ្ឋាបណ្ឌិត ជាម យៀប មានក្តីសោមនស្សរីករាយ ដែលបានចូលរួមជាអធិបតីក្នុងពិធីបើកសិក្ខាសាលាផ្សព្វផ្សាយស្តីពីប្រាក់រៀលប្រព័ន្ធបាគង និងខេអេចឃ្យូអរ (KHQR) ក្នុងគោលបំណងលើកកម្ពស់ការយល់ដឹង និងការចូលរួមនិង របស់ក្រសួង-ស្ថាប័នពាក់ព័ន្ធ និងសាធារណជន ជាពិសេសពីស្ថាប័ននីតិប្បញ្ញត្តិរបស់កម្ពុជា ក្នុងការគាំទ្រប្រាក់រៀល ក៏ដូចជាការអបអរសាទរខួបលើកទី៤៥ នៃការដាក់ឲ្យចរាចរ​ប្រាក់រៀល​ឡើងវិញ (២០ មីនា ឆ្នាំ១៩៨០ - ២០ មីនា ឆ្នាំ២០២៥) ៕