ការិយាល័យរបស់លោកនាយករដ្ឋមន្ត្រីអ៊ីស្រាអែល Benjamin Netanyahu បាននិយាយថា គណៈរដ្ឋមន្ត្រីអ៊ីស្រាអែល បានបោះឆ្នោតគាំទ្រនៅព្រឹកថ្ងៃសុក្រ (២១ មីនា) នេះ ដើម្បីបណ្តេញប្រធានសេវាស៊ើបការណ៍ផ្ទៃក្នុង ឬហៅថាទីភ្នាក់ងារ Shin Bet ចាប់ពីថ្ងៃទី១០ ខែមេសា តទៅ ទោះបីជាបន្ទាប់ពីមានការតវ៉ាយ៉ាងតានតឹង និងហិង្សារយៈពេលបីថ្ងៃប្រឆាំងនឹងលោក Netanyahu ជុំវិញជំហាននេះក៏ដោយ។

កាលពីល្ងាចថ្ងៃព្រហស្បតិ៍ នគរបាលបានប្រើកាណុងបាញ់ទឹក និងចាប់ខ្លួនបាតុករជាច្រើននាក់ ខណៈការប៉ះទង្គិចគ្នាបានផ្ទុះឡើងយ៉ាងហិង្សាក្នុងអំឡុងពេលការតវ៉ានៅក្រុង Tel Aviv និងជិតនិវេសនដ្ឋាននាយករដ្ឋមន្ត្រីក្នុងទីក្រុងហ្សេរុយសាឡិម ជាទីដែលនគរបាលនិយាយថា អ្នកតវ៉ារាប់សិបនាក់បានព្យាយាមទម្លុះរបាំងការពារសន្តិសុខ។

ក្នុងពេលបីថ្ងៃកន្លងមកនេះ ក្រុមបាតុករដែលតវ៉ានឹងផែនការបណ្តេញលោក Bar បានចូលរួមជាមួយក្រុមបាតុករដែលខឹងសម្បារចំពោះការសម្រេចចិត្តបន្តការប្រយុទ្ធគ្នានៅតំបន់ហ្កាហ្សា ដែលបំផ្លាញបទឈប់បាញ់រយៈពេលពីរខែ ខណៈចំណាប់ថ្នូរអ៊ីស្រាអែលចំនួន ៥៩នាក់ នៅតែស្ថិតក្នុងដែនដីហ៊ុមព័ទ្ធប៉ាឡេស្ទីនមួយនោះ។

លោក Netanyahu បាននិយាយនៅសប្តាហ៍នេះថា លោកបាត់បង់ទំនុកចិត្តលើលោក Ronen Bar ដែលបានដឹកនាំ Shin Bet តាំងពីឆ្នាំ២០២១មក ហើយមានបំណងបណ្តេញប្រមុខចារកម្មផ្ទៃក្នុងរូបនេះចេញពីតំណែង។ លោក Bar ក្នុងលិខិតមួយផ្ញើទៅកាន់គណៈរដ្ឋមន្ត្រី បាននិយាយថា ដំណើរការបណ្តេញលោកនេះគឺមិនគោរពតាមនីតិវិធីត្រឹមត្រូវ ហើយជាការអះអាងដោយគ្មានមូលដ្ឋានច្បាស់លាស់៕