ស្ថានទូតសហរដ្ឋអាមេរិកប្រចាំនៅអាហ្រ្វិកខាងត្បូង បាននិយាយកាលពីថ្ងៃព្រហស្បតិ៍ថា ខ្លួនបានទទួលបញ្ជីឈ្មោះមនុស្សជាង ៦៧.000នាក់ ដែលចាប់អារម្មណ៍លើឋានៈជាជនភៀសខ្លួន នៅក្នុងសហរដ្ឋអាមេរិក ក្រោមផែនការរបស់លោកប្រធានាធិបតី ដូណាល់ ត្រាំ ( Donald Trump) ក្នុងការផ្លាស់ទីលំនៅសមាជិកនៃក្រុមជនជាតិភាគតិចស្បែកស ដែលលោកអះអាងថា ជាជនរងគ្រោះនៃការរើសអើងជាតិសាសន៍ ដោយរដ្ឋាភិបាលដឹកនាំដោយជនជាតិអាហ្វ្រិកស្បែកខ្មៅរបស់ពួកគេ។

បញ្ជីឈ្មោះនេះ ត្រូវបានផ្តល់ឲ្យទៅស្ថានទូត ដោយសភាពាណិជ្ជកម្មអាហ្រ្វិកខាងត្បូង នៅសហរដ្ឋអាមេរិក ដែលបាននិយាយថា នេះបានក្លាយជាចំណុចទំនាក់ទំនងសម្រាប់ជនជាតិអាហ្វ្រិកខាងត្បូង ដែលបានសួរអំពីកម្មវិធី ដែលបានប្រកាសដោយរដ្ឋបាលរបស់លោក ត្រាំ កាលពីខែមុន។ សភាពាណិជ្ជកម្មនេះ បានបញ្ជាក់ថា បញ្ជីឈ្មោះនេះដែរ មិនមែនជាការដាក់ពាក្យសុំផ្លូវការទេ។

លោក ត្រាំ បានចេញក្រឹត្យមួយ កាលពីថ្ងៃទី ០៧ ខែកុម្ភៈ ដែលបានកាត់បន្ថយការផ្តល់មូលនិធិរបស់សហរដ្ឋអាមេរិក ដល់អាហ្វ្រិកខាងត្បូង និងបានលើកឡើងពី «សកម្មភាពរបស់រដ្ឋាភិបាល ដែលជំរុញឲ្យមានអំពើហិង្សាដោយអយុត្តិធម៌ ប្រឆាំងនឹងក្រុមម្ចាស់ដីដែលប្រកាន់ពូជសាសន៍»។