សហភាពអឺរ៉ុប (EU) បានពន្យារពេលវិធានការតបតជាលើកដំបូងរបស់ខ្លួន ប្រឆាំងនឹងសហរដ្ឋអាមេរិក ជុំវិញការដំឡើងពន្ធលើលោហធាតុរបស់ប្រធានាធិបតី លោក Donald Trump រហូតដល់ពាក់កណ្តាលខែមេសា ដោយការសម្រេចនេះអាចឲ្យប្លុកគិតគូរឡើងវិញថា តើទំនិញរបស់អាមេរិកណាខ្លះ ដែលត្រូវក្លាយជាគោលដៅ និងផ្តល់រយៈពេលបន្ថែមជាច្រើនសប្តាហ៍ទៀត ដើម្បីធ្វើការចរចា។

គណៈកម្មការអឺរ៉ុប បានលើកឡើងពីវិធានការយកពន្ធឆ្នាំ២០១៨ ដើម្បីដាក់លើផលិតផលអាមេរិក ដែលគិតជាទឹកប្រាក់តម្លៃ ៤,៥ពាន់លានអឺរ៉ូ (៤,៩ពាន់លានដុល្លារ) នៅថ្ងៃទី១ ខែមេសា ដោយបន្ទាប់មកដាក់លើទំនិញអាមេរិកតម្លៃ ១៨ពាន់លានអឺរ៉ុបបន្ថែមទៀត នៅថ្ងៃទី១៣ ខែមេសា។

កាលពីថ្ងៃព្រហស្បតិ៍ (ទី២០ ខែមីនា) ស្នងការពាណិជ្ជកម្មអ៊ឺរ៉ុប លោក Maros Sefcovic បានប្រាប់សវនាការ នៅសភាអឺរ៉ុបថា៖ «ឥឡូវនេះ យើងកំពុងពិចារណា ដើម្បីតម្រឹមពេលវេលានៃវិធានការប្រឆាំងទាំង ២ ដំណាក់កាលរបស់ EU ដូច្នេះ យើងអាចពិគ្រោះជាមួយរដ្ឋសមាជិក ជុំវិញបញ្ជីទាំង ២ ក្នុងពេលដំណាលគ្នា ហើយនេះក៏នឹងផ្តល់ឲ្យយើងនូវពេលវេលាបន្ថែមទៀត ដើម្បីធ្វើការចរចាជាមួយដៃគូអាមេរិករបស់យើង»។

គណៈកម្មាការ ក៏បានអះអាងទៅតាមនោះដែរថា រាល់វិធានការប្រឆាំងរបស់ EU នឹងចូលជាធរមាននៅពាក់កណ្តាលខែមេសា។ ជុំដំបូងនៃវិធានការប្រឆាំងនេះ រួមមានការអនុវត្តពន្ធ ៥០ភាគរយ លើស្រាវីស្គីរបស់សហរដ្ឋអាមេរិក។ ចំណែកលោក Trump បានគំរាមយកពន្ធ ២០០ភាគរយលើស្រាទាំងអស់ និងផលិតផលគ្រឿងស្រវឹងផ្សេងទៀតដែលនាំចូលពី EU ប្រសិនបើប្លុកនេះបន្តវិធានការនេះ៕