នៅថ្ងៃសុក្រនេះ ជនមូស្លីមរាប់ម៉ឺននាក់ នាំគ្នាដង្ហែក្បួននៅក្នុងរដ្ឋធានី Dhaka ប្រទេសបង់ក្លាដែស ដើម្បីតវ៉ាប្រឆាំងការវាយប្រហារតាមច្រកអាកាសកាលពីពេលថ្មីៗនេះរបស់អ៊ីស្រាអែលនៅតំបន់ហ្កាហ្សាដែលបានសម្លាប់មនុស្សរាប់រយនាក់ រួមទាំងកុមារផងដែរ ។

បន្ទាប់ពីពិធីបួងសួង Jummah ក្នុងព្រះវិហារ Baitul Mukarram ស្ថិតនៅភាគកណ្តាលទីក្រុង Dhaka ក្រុមបាតុករនាំគ្នាគ្រវីទង់ប៉ាឡេស្ទីន ហើយនិងស្រែកពាក្យស្លោកថ្កោលទោសការវាយប្រហាររបស់អ៊ីស្រាអែល ។

ស្របពេលដែលមនុស្សរាប់ម៉ឺននាក់នាំគ្នាចូលរួម និងដង្ហែក្បួននៅតាមទីកន្លែងជាច្រើន ជនមូស្លីមផ្សេងទៀត បន្តអង្គុយលើជណ្តើរខាងក្រៅព្រះវិហារ ដោយមានកាន់បដា និងទង់ប៉ាឡេស្ទីន ។

លោក Nur Ahmed គឺជាជនមូស្លីមមួយរូបចូលរួមពិធីដង្ហែក្បួនតវ៉ានេះ និយាយថា ពួកយើងចង់បានរឿងមួយគត់ពីអង្គការសហប្រជាជាតិ(UN) និងក្រុមមេដឹកនាំកំពូលៗរបស់ពិភពលោក គឺសូមមេត្តាបញ្ឈប់ការប្រល័យពូជសាសន៍ដ៏ឃោឃៅលើជនប៉ាឡេស្ទីន ។ ពួកយើងសូមធ្វើការជំរុញដាច់ណាត់ឲ្យចាត់វិធានការមួយនេះ ។

ក្រោយរយៈពេល ២ខែនៃភាពស្ងប់ស្ងាត់ ថ្ងៃដំបូងនៃការវាយប្រហារតាមច្រកអាកាសរបស់អ៊ីស្រាអែលកាលពីថ្ងៃអង្គារ បានសម្លាប់ជនប៉ាឡេស្ទីនជាង ៤០០នាក់ ដែលស្ថិតក្នុងចំណោមថ្ងៃស្លាប់មនុស្សច្រើនបំផុត អំឡុងសង្រ្គាមរយៈពេល ១៧ខែកន្លងមកនេះ ។

រដ្ឋមន្រ្តីក្រសួងការពារជាតិអ៊ីស្រាអែលលោក Israel Katz និយាយនៅថ្ងៃសុក្រនេះ កងទ័ពកំពុងបង្កើនការវាយប្រហារតាមច្រកអាកាស ជើងគោក និងតាមសមុទ្រលើតំបន់ហ្កាហ្សា ដើម្បីដាក់សំពាធក្រុមហាម៉ាស់ ដោះលែងចំណាប់ថ្នូរសេសសល់ ហើយនិងជម្លៀសជនស៊ីវិលទៅកាន់តំបន់ភាគខាងត្បូងនៃដែនដីបិទច្រកមួយនេះផងដែរ ៕