យោងតាមរបាយការណ៍របស់អង្គការ UNESCO ដែលបានបញ្ចេញនៅថ្ងៃសុក្រនេះ បានឲ្យដឹងថា ផ្ទាំងទឹកកកនៅជុំវិញពិភពលោក កំពុងរលាយលឿនជាងពេលណាៗទាំងអស់ ដោយរយៈពេល ៣ឆ្នាំចុងក្រោយនេះ គេមើលឃើញបាត់បង់ផ្ទាំងទឹកកកធំបំផុតជាប់កំណត់ត្រា ។

ការបាត់បង់ទឹកកកសរុប ៩ពាន់ជីហ្គាតោន ចាប់តាំងពីឆ្នាំ ១៩៧៥ ត្រូវបានគេរំពឹងថានឹងបន្តកើតមានបញ្ហាសេដ្ឋកិច្ច បរិស្ថាន និងសង្គម ស្របពេលដែលនីវ៉ូទឹកសមុទ្រកើនឡើង ហើយប្រភពទឹកសំខាន់ៗធ្លាក់ចុះ ។

លោក Michael Zemp ប្រធានសេវាកម្មតាមដានផ្ទាំងទឹកកកពិភពលោក និយាយអំឡុងសន្និសីទសារព័ត៌មានចេញរបាយការណ៍នៅទីក្រុងហ្សឺណែវ ប្រទេសស្វីសថា វាអាចជាដុំទឹកកកមានទំហំប៉ុនប្រទេសអាល្លឺម៉ង់ មានកម្រាស់ ២៥ម៉ែត្រ ។ នោះគឺជាទឹកកកដែលពួកយើងបាត់បង់ពីផ្ទាំងទឹកកក ចាប់តាំងពីឆ្នាំ ១៩៧៥ ។

លោក Zemp បន្តថា ផ្ទាំងទឹកកកអាចនឹងបាត់បង់ក្នុងសតវត្សរ៍នេះ ផ្អែកលើអត្រារលាយបច្ចុប្បន្ន ពោលគឺរយៈពេល ៥ឆ្នាំក្នុងចំណោមរយៈពេល ៦ឆ្នាំចុងក្រោយនេះ បានចុះបញ្ជីជាការបាត់បង់ទឹកកកច្រើនជាងគេបំផុត ក្នុងនោះផ្ទាំងទឹកកក បាត់បង់ទឹកកកទម្ងន់ ៤៥០ជីហ្គាតុន ក្នុងឆ្នាំ ២០២៤ ។

ការរលាយលឿន បានធ្វើឲ្យផ្ទាំងភ្នំទឹកកកដែលជាអ្នករួមចំណែកធំដល់ការកើនឡើងនីវ៉ូទឹកសមុទ្រ នឹងធ្វើឲ្យមនុស្សរាប់លាននាក់ប្រឈមនឹងទឹកជំនន់ធ្ងន់ធ្ងរ និងធ្វើឲ្យប៉ះពាល់ដល់លំហូរទឹកដែលមនុស្សរាប់ពាន់លាននាក់ពឹងផ្អែកសម្រាប់ថាមពលវារីអគ្គិសនី និងកសិកម្ម ។

លោក Stefan Uhlenbrook គឺជាប្រធានផ្នែកមណ្ឌលទឹក និងមណ្ឌលកំណកនៅអង្គការឧតុនិយមពិភពលោកនិយាយថា ផ្ទាំងទឹកកកចំនួន ២៧៥.០០០នៅមានលើសកលលោក ស្ថិតនៅតាមផ្ទាំងទឹកកកអង់តាក់ទិក និងតំបន់ហ្គ្រីនឡែន ដែលមានចំណុះប្រហែល ៧០ភាគនៃទឹកសាបពិភពលោក ៕