បេសកជនពិសេសរបស់លោកប្រធានាធិបតីអាមេរិក Donald Trump ប្រចាំតំបន់មជ្ឈិមបូព៌ា គឺលោក Steve Witkoff បានប្រាប់អ្នកកាសែតអាមេរិកឈ្មោះ Tucker Carlson នៅក្នុងបទសម្ភាសន៍មួយកាលពីថ្ងៃសុក្រ ២១ មីនា ថា ថ្នាក់ដឹកនាំរបស់អ៊ុយក្រែន បានយល់ព្រមរៀបចំការបោះឆ្នោតប្រធានាធិបតី។

លោក Carlson បាននិយាយថា ទីក្រុងមូស្គូចាត់ទុកលោកប្រធានាធិបតីអ៊ុយក្រែន Volodymyr Zelensky ថា "មិនមែនជាមេដឹកនាំជាប់ឆ្នោត" ហើយដូច្នេះ "មិនអាចចុះហត្ថលេខាលើសន្ធិសញ្ញាប្រភេទណាមួយបានឡើយ"។ នៅពេលត្រូវសាកសួរថាតើនឹងមានការបោះឆ្នោតនៅអ៊ុយក្រែនឬទេ លោកប្រេសិត Witkoff បានឆ្លើយតបដោយមិនផ្តល់ព័ត៌មានលម្អិតបន្ថែមថា "ពិតហើយ នឹងមានការបោះឆ្នោត។ ថ្នាក់ដឹកនាំទីក្រុងគីវ បានយល់ព្រមរួចហើយថានឹងមានការបោះឆ្នោតនៅអ៊ុយក្រែន"។ 

គួរឱ្យដឹងថា វិមានក្រឹមឡាំងបានអះអាងជាយូរមកហើយថាលោក Zelensky មិនមែនជាមេដឹកនាំស្របច្បាប់ទេ ដោយសារអាណត្តិប្រធានាធិបតីរបស់លោកបានអស់។ 

អ៊ុយក្រែនមិនបានរៀបចំការបោះឆ្នោតក្នុងអំឡុងពេលសង្គ្រាមទ្រង់ទ្រាយធំរបស់រុស្ស៊ីទេ ដោយសារតែរឿងនេះត្រូវហាមឃាត់ក្រោមច្បាប់អាជ្ញាសឹក ដែលបានប្រកាសនៅថ្ងៃទី២៤ ខែកុម្ភៈ ឆ្នាំ២០២២ ត្រឹមតែប៉ុន្មានម៉ោងបន្ទាប់ពីការវាយលុកចាប់ផ្តើម។ ច្បាប់អ៊ុយក្រែនក៏តម្រូវឱ្យការបោះឆ្នោតមានសុវត្ថិភាព ស្មើភាព និងគ្មានការរំខាន ដែលជាលក្ខខណ្ឌមិនអាចធ្វើបាន ខណៈរុស្ស៊ីបន្តការវាយប្រហារមិនឈប់៕