រយៈពេលប៉ុន្មានថ្ងៃបន្ទាប់ពីរដ្ឋអាជ្ញានៅសហរដ្ឋអាមេរិក បានចោទប្រកាន់មេដឹកនាំក្រុមជនអន្ធពាលជនជាតិហៃទីដ៏មានឥទ្ធិពលម្នាក់ ឈ្មោះ Johnson Andre ដែលគេស្គាល់ថា ជា Izo ពីបទការចាប់ពលរដ្ឋអាមេរិក ធ្វើជាចំណាប់ខ្មាំង នៅប្រទេសហៃទី អ្នកស្រុកនៃទីក្រុងព័រអូប្រាំង ( Port au Prince) និយាយថា ពួកគេបន្តរស់នៅក្នុងការភ័យខ្លាចចំពោះឧក្រិដ្ឋកម្មដែលមានអង្គការចាត់តាំង។

នៅពេលដែលរថពាសដែកយាមល្បាតតាមដងផ្លូវ ស្នូរកាំភ្លើង អាចត្រូវបានគេឮពីចម្ងាយ កាលពីថ្ងៃសុក្រ (ទី២១ ខែមីនា) ហើយអ្នកស្រុកនិយាយថា ពួកគេបានបាត់បង់អ្វីៗទាំងអស់ ដែលពួកគេមាន រួមទាំងផ្ទះសម្បែងរបស់ពួកគេផងដែរ ដោយសារសង្គ្រាមរបស់ក្រុមជនអន្ធពាល។

អ្នកស្រុកម្នាក់ឈ្មោះ Agata Auguste បាននិយាយថា៖«គ្រប់ទីកន្លែងដែលយើងចង់ទៅ គឺត្រូវបានគ្រប់គ្រងដោយក្រុមជនអន្ធពាល»។

ក្នុងរយៈពេលប៉ុន្មានឆ្នាំចុងក្រោយនេះ ក្រុមជនអន្ធពាលបង្កហិង្សានៅប្រទេសហៃទី បានពង្រីកការគ្រប់គ្រងរបស់ពួកគេយ៉ាងខ្លាំង លើទឹកដីក្នុងប្រទេសកោះការ៉ាអ៊ីប ជាពិសេសនៅក្នុងរដ្ឋធានីព័រអូប្រាំង ចំពេលមានវិបត្តិសន្តិសុខអូសបន្លាយដែលមានការបាញ់ប្រហារជាញឹកញាប់ ដែលបានធ្វើឲ្យស៊ីវិលរាប់ពាន់នាក់ ជាប់នៅក្នុងជម្លោះនេះ។ 

ជម្លោះបង្កឡើងដោយក្រុមជនអន្ធពាលដែលអង្គការសហប្រជាជាតិ បានព្រមានថា កំពុងត្រូវបានបញ្ឆេះដោយកាំភ្លើងដឹកជញ្ជូនចេញពីរដ្ឋហ្ល្វរីដានៃសហរដ្ឋអាមេរិក បានធ្វើឲ្យមនុស្សជាង ១ លាននាក់គ្មានផ្ទះសម្បែង នៅក្នុងប្រទេសហៃទី។