កងទ័ពអ៊ីស្រាអែលបានបញ្ជាឱ្យមានការជម្លៀសទាំងស្រុងពីសង្កាត់ Tal Al-Sultan ក្នុងទីក្រុង Rafah ភាគខាងត្បូងហ្កាហ្សា ដោយទាមទារឱ្យប្រជាជនក្នុងតំបន់នេះចាកចេញពីផ្ទះសម្បែងរបស់ពួកគេជាបន្ទាន់ ហើយឆ្ពោះទៅភាគខាងជើង ទៅកាន់តំបន់ al-Mawasi ។ 

ក្នុងការបង្ហោះនៅលើប្រព័ន្ធផ្សព្វផ្សាយសង្គមថ្ងៃនេះ កងទ័ពបានណែនាំអ្នកដែលមានវត្តមាននៅក្នុងសង្កាត់ Tal Al-Sultan ជម្លៀសចេញ ហើយធ្វើដំណើរដោយថ្មើរជើងទៅកាន់ទីតាំងមនុស្សធម៌ក្នុងតំបន់ al-Mawasi ជាតំបន់ដែលបានមើលឃើញការសម្លាប់រង្គាលជាច្រើននៃជនស៊ីវិលស្លូតត្រង់ដោយកងទ័ពអ៊ីស្រាអែល ចាប់តាំងពីការចាប់ផ្តើមនៃសង្រ្គាមប្រល័យពូជសាសន៍កាលពីខែតុលា។

តំបន់ al-Mawasi ក៏ខ្វះខាតហេដ្ឋារចនាសម្ព័ន្ធសំខាន់ៗផងដែរ រួមទាំងទឹក និងសេវាមូលដ្ឋានផ្សេងៗ ដោយសារជាតំបន់គ្មានមនុស្សរស់នៅ។ពួកគេប្រឈមវិបត្តិសុខភាព និងបរិស្ថានធ្ងន់ធ្ងរ ស្របពេលជំងឺផ្សេងៗ និងការរាតត្បាតរីករាលដាល។

គ្រួសារនានាដែលផ្លាស់ទីលំនៅកំពុងប្រឈមស្ថានភាពលំបាកយ៉ាងខ្លាំងក្នុងការផ្លាស់ទីលំនៅ ពិសេសសម្រាប់មនុស្សចាស់ អ្នកជំងឺ និងតម្រូវការចាំបាច់របស់ពួកគេ ចាប់តាំងពីប្រទេសអ៊ីស្រាអែល រារាំងសកម្មភាពមនុស្សមិនឲ្យប្រើប្រាស់យានជំនិះ៕