នាយករដ្ឋមន្ត្រីចិន លោក Li Qiang កាលពីថ្ងៃអាទិត្យ (ទី២៣ ខែមីនា) បានសង្កត់ធ្ងន់ថា ចំណងទាក់ទងខាងផ្នែកសេដ្ឋកិច្ច និងពាណិជ្ជកម្ម គឺជាមូលដ្ឋានគ្រឹះ សម្រាប់ទំនាក់ទំនងចិន-អាមេរិក ដោយបានអំពាវនាវឲ្យមានកិច្ចសន្ទនា និងកិច្ចសហប្រតិបត្តិការរវាងប្រទេសទាំង២ ក្នុងអំឡុងពេលមានជំនួបជាមួយសមាជិកព្រឹទ្ធសភាអាមេរិក លោក Steve Daines ក្នុងទីក្រុងប៉េកាំង។

យោងតាមទីភ្នាក់ងារសារព័ត៌មានរដ្ឋ Xinhua បានឲ្យដឹងថា លោក Li បានប្រាប់សមាជិកសភាទៅពីបក្សសាធារណរដ្ឋថា ទំនាក់ទំនងចិន-អាមេរិក បានឈានដល់ «ដំណាក់កាលថ្មី និងសំខាន់» ខណៈដែលរូបលោកបានជំរុញឲ្យសហរដ្ឋអាមេរិកគោរពតាម «គោលការណ៍នៃការគោរពគ្នាទៅវិញទៅមក ការរួមរស់ជាមួយគ្នាដោយសន្តិភាព» និងការមានកិច្ចសហប្រតិបត្តិការ។ ជាមួយគ្នានេះ លោក Li មន្ត្រីកម្រិតខ្ពស់ទី ២ របស់ចិន ក៏បានអំពាវនាវឲ្យមាន «ការប្រាស្រ័យទាក់ទងគ្នាដោយស្មោះត្រង់» ដើម្បីធ្វើឲ្យទំនុកចិត្ត និងកិច្ចសហប្រតិបត្តិការជាក់ស្តែងកាន់តែមានភាពស៊ីជម្រៅ និងដើម្បីលើកកម្ពស់ «ការអភិវឌ្ឍប្រកបដោយស្ថិរភាព ល្អប្រសើរ និងនិរន្តរភាព» នៃទំនាក់ទំនងទៅវិញទៅមក។

លោក Daines ត្រូវបានអមដំណើរដោយនាយកប្រតិបត្តិនៃក្រុមហ៊ុនធំៗរបស់អាមេរិក រួមមាន FedEx, Qualcomm, Pfizer និង Boeing។ សហរដ្ឋអាមេរិកមានក្រុមនាយកប្រតិបត្តិបរទេសច្រើនជាងគេចូលរួមវេទិកាអភិវឌ្ឍប្រទេសចិន ដែលបានចាប់ផ្តើមកាលពីថ្ងៃអាទិត្យ (ទី២៣ ខែមីនា)។

សារព័ត៌មាន បានដកស្រង់សម្តីលោក Daines ដែលបាននិយាយថា ក្រុមហ៊ុនអាមេរិកបានដើរតួយ៉ាងសកម្ម ក្នុងការអភិវឌ្ឍរបស់ប្រទេសចិន ហើយមានឆន្ទៈបន្តវិនិយោគ នៅក្នុងប្រទេសនេះ ខណៈពេលដែលពង្រឹងកិច្ចសន្ទនា និងកិច្ចសហប្រតិបត្តិការ។ លោក Daines គឺជាអ្នកគាំទ្រយ៉ាងខ្លាំងក្លា ចំពោះប្រធានាធិបតីអាមេរិក លោក Donald Trump ហើយកំពុងធ្វើទស្សនកិច្ចនៅទីក្រុងប៉េកាំង បន្ទាប់ពីមានការប្រកាសរបស់លោក Trump អំពីការដំឡើងពន្ធបន្ថែមលើទំនិញរបស់ចិន។ កិច្ចប្រជុំរបស់លោក Daines ជាមួយលោក Li បានកើតមានឡើងបន្ទាប់ការបើកវេទិកាអភិវឌ្ឍន៍ចិន។ នៅក្នុងសុន្ទរកថាគន្លឹះរបស់លោក លោក Li បានលើកឡើងថា ទីក្រុងប៉េកាំងបានត្រៀមខ្លួន ដើម្បីដោះស្រាយជាមួយនឹង «ព្រឹត្តិការណ៍ដ៏គួរឲ្យភ្ញាក់ផ្អើល» ដែលកើតចេញពី «ប្រភពខាងក្រៅ» ហើយបានគូសបញ្ជាក់ពីការប្តេជ្ញាចិត្តរបស់ប្រទេសចិន ក្នុងការបើកចំហសេដ្ឋកិច្ចរបស់ខ្លួន៕