ទំនាក់ទំនងរវាងដែនដី Greenland និងសហរដ្ឋអាមេរិក បានធ្លាក់ចុះបន្ថែមទៀត កាលពីថ្ងៃទី២៣ ខែមីនា ខណៈដែលលោកនាយករដ្ឋមន្ត្រី Greenland បានផ្ទុះកំហឹងជុំវិញអ្វីដែលលោកហៅថា បេសកកម្ម «ឈ្លានពាន» របស់មន្ត្រីជាន់ខ្ពស់ដែលរដ្ឋបាលរបស់លោក Donald Trump បាននិយាយថា ខ្លួននឹងបញ្ជូនទៅកាន់កោះនេះ ក្នុងសប្តាហ៍នេះ។

លោកស្រី Usha Vance ស្រី្តទី២ របស់សហរដ្ឋអាមេរិក និងលោក Michael Waltz ទីប្រឹក្សាសន្តិសុខជាតិរបស់សហរដ្ឋអាមេរិក ស្ថិតក្នុងចំណោមមន្ត្រីត្រូវធ្វើដំណើរទៅកាន់កោះនេះ ដែលជាដែនដីពាក់កណ្តាលស្វយ័តរបស់ប្រទេសដាណឺម៉ាក តែប្រធានាធិបតីសហរដ្ឋអាមេរិក លោក Trump បានប្តេជ្ញាថា នឹងធ្វើឲ្យកោះនេះក្លាយជាផ្នែកមួយរបស់សហរដ្ឋអាមេរិក តាម «មធ្យោបាយមួយ ឬមធ្យោបាយផ្សេងទៀត»។

លោកស្រី Vance គ្រោងនឹងឈប់សម្រាកវប្បធម៌ជាបន្តបន្ទាប់ ក្រោយពីលោកស្រី ទៅដល់នៅថ្ងៃទី ២៧ ខែមីនា ដាច់ដោយឡែកពីលោក Waltz ដែលទីប្រឹក្សាសន្តិសុខជាតិអាមេរិករូបនេះ ត្រូវបានគេសន្មតថា នឹងធ្វើដំណើរ នៅដើមសប្តាហ៍នេះ ជាមួយរដ្ឋមន្ត្រីថាមពលអាមេរិកលោក Chris Wright។

នាយករដ្ឋមន្ត្រី Greenland  លោក Mute Egede បាននិយាយកាលពីថ្ងៃទី២៣ ខែមីនាថា កិច្ចប្រឹងប្រែងការទូតរបស់អ្នកស្រុក Greenland  គ្រាន់តែចង់បង្ហាញអំពីគំនិតរបស់លោក Trump និងរដ្ឋបាលរបស់លោក នៅក្នុងបេសកកម្មរបស់ពួកគេ ដើម្បីធ្វើជាម្ចាស់ និងគ្រប់គ្រងដែនដី Greenland ប៉ុណ្ណោះ។

លោកបានធ្វើការកត់សម្គាល់ ដែលជាការខឹងសម្បាខ្លាំងបំផុតរបស់លោក ទៅកាន់សារព័ត៌មាន Greenlandic កាលពីថ្ងៃទី២៣ ខែមីនា ហើយសមាជិកជាន់ខ្ពស់នៃគណបក្សរបស់លោក បានបញ្ជាក់ពីការលើកឡើងដោយកំហឹងនោះ។ នាយករដ្ឋមន្ត្រី Greenland ហាក់ដូចជាមានការខកចិត្តខ្លាំងជាពិសេស ចំពោះការមានចំណែកពាក់ព័ន្ធរបស់លោក Waltz។

មន្ត្រីដែនដី Greenland ផ្សេងទៀត បានរិះគន់ថា ជារឿងមិនសមរម្យ ក្នុងការធ្វើដំណើរទស្សនកិច្ច នៅពេលនេះ ដោយចង្អុលបង្ហាញថា កោះ Greenland ទើបតែរៀបចំការបោះឆ្នោតសភា ហើយថា រដ្ឋាភិបាលថ្មីមិនទាន់ត្រូវបានបង្កើតឡើងនៅឡើយទេ៕