ទេសចរជនជាតិដាណឺម៉ាកឈ្មោះ Kennet Brask ពេញចិត្តការធ្វើដំណើរនេសាទកម្សាន្តរបស់លោកទៅកាន់រដ្ឋ Florida កាលពីឆ្នាំ២០២៣ ហើយគ្រោងវិលត្រលប់ទៅម្ដងទៀត ក្នុងឆ្នាំ២០២៥។ ប៉ុន្តែបន្ទាប់ពីឃើញការផ្ទុះកំហឹងរបស់ប្រធានាធិបតីអាមេរិក លោក Donald Trump អំឡុងជំនួបជាមួយមេដឹកនាំអ៊ុយក្រែនលោក Volodymyr Zelensky នៅសេតវិមាន រូបគេបានលុបចោលគម្រោងនេះ។

អមដោយការបន្ថែមថា លោក Trump ជាបុគ្គល «មិនរាបសារ» និងមិនមានអាកប្បកិរិយាដូចមនុស្សពេញវ័យទាល់តែសោះនោះ លោក Brask បានប្រាប់សារព័ត៌មាន Reuters ថា៖ «នៅពេលខ្ញុំបានឃើញហេតុការណ៍ ក្នុងកិច្ចប្រជុំនេះ ខ្ញុំបានប្រាប់ខ្លួនឯងថា ខ្ញុំមិនទៅសហរដ្ឋអាមេរិកទៀតទេ ដរាបណាលោក Trump នៅតែជាប្រធានាធិបតីនៅទីនោះ»។

ផ្ទុយទៅវិញ រូបគេនឹងធ្វើដំណើរទៅប្រទេសម៉ិកស៊ិក។ បើយោងតាមភ្នាក់ងារទេសចរណ៍ចំនួន ៥ នៅទូទាំងទ្វីបអឺរ៉ុប បានឲ្យដឹងថា លោក Brask គឺជាម្នាក់ ក្នុងចំណោមជនជាតិដាណឺម៉ាក ជនជាតិអាល្លឺម៉ង់ និងជនជាតិអឺរ៉ុបមួយចំនួន ដែលកំពុងពិចារណាឡើងវិញនូវផែនការធ្វើដំណើររបស់ខ្លួន ដោយសារវិធានការរបស់លោក Trump។

ក្នុងរយៈពេលត្រឹមតែ ២ខែប៉ុណ្ណោះ លោក Trump បានកែប្រែយ៉ាងខ្លាំងក្លា សម្រាប់សម្ព័ន្ធភាពយូរអង្វែងរបស់អាមេរិក ជាមួយអឺរ៉ុប ដោយលើកឡើងពីការបញ្ចូលដែនដី Greenland ចាប់ផ្តើមសង្រ្គាមពាណិជ្ជកម្មពិភពលោក និងបានចេញក្រឹត្យដែលផ្តោតលើគោលនយោបាយព្រំដែនតឹងរ៉ឹង រឹតបន្តឹងនីតិវិធីត្រួតពិនិត្យទិដ្ឋាការ និងការបង្ក្រាបលើជនជនអន្តោប្រវេសន៍ខុសច្បាប់ នៅក្នុងសហរដ្ឋអាមេរិក។

យោងតាមតួលេខរបស់សហភាពអឺរ៉ុប បានឲ្យដឹងថា ប្រជាជនអឺរ៉ុបបានចំណាយប្រាក់ចំនួន ១៥៥ពាន់លានដុល្លារ សម្រាប់ការធ្វើដំណើរទៅកាន់សហរដ្ឋអាមេរិក ក្នុងឆ្នាំ២០២៣ ខណៈពេលដែលការធ្វើដំណើរឆ្លងកាត់មហាសមុទ្រអាត្លង់ទិក បានជំរុញប្រាក់ចំណូលរបស់ក្រុមហ៊ុនអាកាសចរណ៍ឲ្យកើនឡើង ដូចជាក្រុមហ៊ុន British Airways ក្នុងត្រីមាសថ្មីៗនេះ។

យោងតាមទិន្នន័យបឋមពីការិយាល័យទេសចរណ៍ និងទេសចរណ៍ជាតិសហរដ្ឋអាមេរិក (NTTO) បានបង្ហាញថា ចំនួនភ្ញៀវទេសចរទៅកាន់សហរដ្ឋអាមេរិកពីអឺរ៉ុបខាងលិច បានធ្លាក់ចុះ ១ភាគរយ បើធៀបនឹងរយៈពេលដូចគ្នា ក្នុងខែកុម្ភៈ បន្ទាប់ពីបានកើនឡើង ១៤ភាគរយក្នុងរយៈពេលដូចគ្នា ក្នុងឆ្នាំ២០២៤៕