យោធាហ្វីលីពីន បានប្រាប់ឲ្យដឹងថា ទាហានមកពីកងទ័ពរបស់ហ្វីលីពីន និងសហរដ្ឋអាមេរិក បានចាប់ផ្តើមសមយុទ្ធយោធារួមគ្នារយៈពេល ៣សប្តាហ៍ នៅថ្ងៃចន្ទ (ទី២៤ ខែមីនា) នេះ ដោយលំហាត់សមនេះផ្តោតលើការការពារទឹកដី និងការបញ្ជាដាក់ពង្រាយកងកម្លាំងទ្រង់ទ្រាយធំ។

ទាហានប្រហែល ៥.០០០នាក់ មកពីកងយោធាហ្វីលីពីន និងកងយោធាសហរដ្ឋអាមេរិក ប្រចាំតំបន់ប៉ាស៊ីហ្វិក នឹងចូលរួមក្នុងការហ្វឹកហាត់ធ្វើសង្គ្រាម និងផ្លាស់ប្តូរជំនាញឲ្យគ្នាទៅវិញទៅមក នៅក្នុងដំណាក់កាលដំបូងនៃសមយុទ្ធឈ្មោះ Salaknib នាឆ្នាំនេះ។ ដំណាក់កាលទី២ គ្រោងធ្វើនៅចុងឆ្នាំនេះ។

មន្ទីរបញ្ចកោណ បានប្រកាសកាលពីសប្តាហ៍មុនថា រដ្ឋមន្ត្រីការពារជាតិអាមេរិក លោក Pete Hegseth នឹងធ្វើដំណើរទៅកាន់ទីក្រុងម៉ានីល ក្នុងសប្តាហ៍នេះ ដើម្បីជួបជាមួយបណ្ដាថ្នាក់ដឹកនាំ និងកងកម្លាំងហ្វីលីពីន។

កងទ័ពហ្វីលីពីនបានឲ្យដឹងនៅក្នុងសេចក្តីថ្លែងការណ៍មួយថា សមយុទ្ធនេះនឹងផ្តោតលើការពង្រឹងប្រតិបត្តិការរួមបញ្ចូលគ្នា រវាងកងទ័ពរបស់ប្រទេសទាំង២ សមយុទ្ធទ្រង់ទ្រាយធំ ការហ្វឹកហ្វឺនបច្ចេកទេសបាញ់គ្រាប់ពិត និងយុទ្ធសាស្ត្រការពារទឹកដី។

សូមបញ្ជាក់ថា សមយុទ្ធឈ្មោះ Salaknib បានចាប់ផ្តើមនៅក្នុងឆ្នាំ២០១៦ ហើយជាការចូលរួមហាត់សមប្រចាំឆ្នាំ រវាងសម្ព័ន្ធមិត្តជាប់សន្ធិសញ្ញាទាំង២ ដែលជាផ្នែកមួយនៃសមយុទ្ធហ្វឹកហាត់ធំជាងនេះឈ្មោះ Balikatan (ស្មាប្រកៀកស្មា)។

កិច្ចសហប្រតិបត្តិការផ្នែកសន្តិសុខ រវាងប្រទេសទាំង២ បានកើនឡើងក្រោមប្រធានាធិបតីហ្វីលីពីន Ferdinand Marcos Jr ដែលបានប្ដូរទិសដៅចូលកាន់តែកៀកនឹងសហរដ្ឋអាមេរិក៕