ប្រភពសន្តិសុខបានប្រាប់សារព័ត៌មាន Reuters លពីថ្ងៃចន្ទ២៤ មីនា ថាប្រទេសអេហ្ស៊ីប បានអនុវត្តសំណើថ្មីមួយក្នុងគោលបំណងស្ដារឡើងវិញនូវកិច្ចព្រមព្រៀងបទឈប់បាញ់ក្នុងតំបន់ហ្កាហ្សា ខណៈអាជ្ញាធរសុខាភិបាលប៉ាឡេស្ទីននិយាយថា ការវាយប្រហារថ្មីរបស់អ៊ីស្រាអែលបានសម្លាប់មនុស្សយ៉ាងហោចណាស់ ៦៥ នាក់បន្ថែមទៀតនៅដែនដីឡោមព័ទ្ធមួយនេះក្នុងរយៈពេល២៤ ម៉ោងចុងក្រោយ។

សំណើដែលបានធ្វើឡើងកាលពីសប្តាហ៍មុន កើតមានបន្ទាប់ពីមានការកើនឡើងនៃអំពើហិង្សា ក្រោយអ៊ីស្រាអែលបានបន្តប្រតិបត្តិការតាមអាកាស និងថ្មើរជើងដាក់គោលដៅលើក្រុមសកម្មប្រយុទ្ធហាម៉ាស កាលពីថ្ងៃទី ១៨ ខែមីនា បញ្ចប់ភាពជាប់គាំងរយៈពេលពីរខែ បន្ទាប់ពីសង្គ្រាម១៥ ខែ។

ផែនការរបស់អេហ្ស៊ីប អំពាវនាវឲ្យក្រុមហាម៉ាសដោះលែងចំណាប់ខ្មាំង៥នាក់ក្នុងមួយសប្ដាហ៍ ហើយអ៊ីស្រាអែល ត្រូវអនុវត្តដំណាក់កាលពី២នៃបទឈប់បាញ់បន្ទាប់ពីសប្ដាហ៍ដំបូង។

មន្ត្រីសុខាភិបាលហ្កាហ្សាបាននិយាយថា ការវាយប្រហារតាមអាកាស និងការបាញ់ផ្លោងរបស់អ៊ីស្រាអែលបានសម្លាប់ប្រជាជនប៉ាឡេស្ទីនជាង ៧០០ នាក់កាលពីសប្ដាហ៍មុន រួមទាំងស្ត្រី និងកុមារយ៉ាងហោចណាស់ ៤០០ នាក់ផងដែរ។

ក្រុមគ្រូពេទ្យបាននិយាយថា ក្នុងចំណោមអ្នកដែលត្រូវបានសម្លាប់កាលពីថ្ងៃចន្ទដើមសប្ដាហ៍នេះ មានអ្នកសារព័ត៌មានក្នុងស្រុកពីរនាក់ម្នាក់ឈ្មោះ Mohammad Mansour និងម្នាក់ទៀតឈ្មោះ Hussam Shabat ។ក្រុមអ្នកសារព័ត៌មានប៉ាឡេស្ទីនបាននិយាយថា អ្នកកាសែតយ៉ាងហោចណាស់ ២០៦នាក់ត្រូវបានសម្លាប់ដោយការវាយប្រហាររបស់អ៊ីស្រាអែលនៅតំបន់ហ្កាហ្សាចាប់តាំងពីដើមខែតុលាឆ្នាំ ២០២៣នៅពេលជម្លោះបានផ្ទុះឡើង។ ពុំមានការអត្ថាធិប្បាយភ្លាមៗរបស់អ៊ីស្រាអែលទេ។

ក្រុមហាម៉ាសបាននិយាយថា មន្ត្រីជាន់ខ្ពស់ផ្នែកនយោបាយ និងសន្តិសុខរបស់ខ្លួនជាច្រើននាក់ក៏ត្រូវបានសម្លាប់ផងដែរ៕