ពលរដ្ឋនៅក្នុងទីក្រុង Toronto ប្រទេសកាណាដា បាននិយាយកាលពីថ្ងៃចន្ទ ថា ការដំឡើងពន្ធ និងទំនាក់ទំនងជាមួយសហរដ្ឋអាមេរិក គឺជាអាទិភាពកំពូលសម្រាប់ការបោះឆ្នោតនៅថ្ងៃទី ២៨ ខែមេសា ខាងមុខនេះ។

លោក Jameson អាយុ២៩ ឆ្នាំជាអ្នករស់នៅទីក្រុង Toronto បាននិយាយ ថា «ខ្ញុំរំពឹងថា នណាក៏ដោយ ដែលជានាយករដ្ឋមន្រ្តី នណាក៏ដោយជាមេដឹកនាំ នោះពួកគេត្រូវស្មោះត្រង់ចំពោះប្រទេសកាណាដា ហើយយើងមិនចុះចាញ់ចំពោះការដំឡើងពន្ធណាមួយ និងភាពមិនសមហេតុសមផលណាមួយ សម្រាប់ការក្លាយជារដ្ឋទី៥១ របស់សហរដ្ឋអាមេរិក។

កាលពីថ្ងៃអាទិត្យ លោក Mark Carney នាយករដ្ឋមន្ត្រីទើបស្បថចូលកាន់តំណែងថ្មីរបស់ប្រទេសកាណាដា បានអំពាវនាវឲ្យមានការបោះឆ្នោតមុនអាណត្តិ ដោយនិយាយថា លោកត្រូវការអាណត្តិដ៏រឹងមាំ ដើម្បីដោះស្រាយជាមួយនឹងការគំរាមកំហែងបង្កឡើងដោយប្រធានាធិបតីសហរដ្ឋអាមេរិក លោក Donald Trump ដែល «មានបំណងបំបែកពួកយើង ដើម្បីអោយអាមេរិកអាចក្លាយជាម្ចាស់ពួកយើង» ។

ការអត្ថាធិប្បាយបែបនេះ បានបង្ហាញពីវិសាលភាពទំនាក់ទំនងរវាងសហរដ្ឋអាមេរិក និងកាណាដា ដែលជាសម្ព័ន្ធមិត្តយូរអង្វែងទាំងពីរ និងជាដៃគូពាណិជ្ជកម្មដ៏សំខាន់ បានធ្លាក់ចុះ ចាប់តាំងពីលោក Trump បានដំឡើងពន្ធលើប្រទេសកាណាដា ហើយបានគំរាមដាក់បញ្ចូលឧបសម្ព័ន្ធប្រទេសកាណា ជារដ្ឋទី៥១ ។