ទីភ្នាក់ងារអង្គការសហប្រជាជាតិចំនួនពីរ បានព្រមានកាលពីថ្ងៃចន្ទ (២៤ មីនា) ថា កង្វះខាតណាមួយក្នុងការផ្តល់មូលនិធិពីម្ចាស់ជំនួយពិភពលោក អាចបង្កឱ្យមានផលវិបាកយ៉ាងធ្ងន់ធ្ងរដល់ជនភៀសខ្លួនរ៉ូហ៊ីងយ៉ា នៅក្នុងប្រទេសបង់ក្លាដែស។

ទីភ្នាក់ងារជនភៀសខ្លួន UNHCR និងអង្គការទេសន្តរប្រវេសន៍អន្តរជាតិ IOM បានចេញការព្រមាននេះនៅក្នុងកិច្ចចាប់ផ្តើមនៃការអំពាវនាវមូលនិធិពហុឆ្នាំរួមគ្នាលើកដំបូង សម្រាប់ជំនួយស្បៀងអាហារ និងការអប់រំដល់ប្រជាជនរ៉ូហ៊ីងយ៉ា ដែលបានភៀសខ្លួនចេញពីអំពើហិង្សាក្នុងសហភាពមីយ៉ាន់ម៉ាជិតខាង អស់រយៈពេល ៨ឆ្នាំមកហើយ។

ទីភ្នាក់ងារទាំងពីរនេះ រួមជាមួយដៃគូចំនួន ១១៣ កំពុងអំពាវនាវរកប្រាក់ចំនួន ៩៣៤,៥លានដុល្លារ ក្នុងឆ្នាំដំបូងនៃការអំពាវនាវ ២០២៥-២០២៦ ដើម្បីជួយដល់ប្រជាជនប្រហែល ១,៤៨លាននាក់នៅបង់ក្លាដែស រួមទាំងជនភៀសខ្លួនរ៉ូហ៊ីងយ៉ា និងសហគមន៍អ្នកទទួលជនភៀសខ្លួនទាំងនោះផងដែរ។

កាលពីដើមខែមីនា កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ បានប្រកាសកាត់បន្ថយការផ្តល់អាហារូបត្ថម្ភសម្រាប់ជនភៀសខ្លួនរ៉ូហ៊ីងយ៉ា បន្ទាប់ពីការបិទប្រតិបត្តិការរបស់ទីភ្នាក់ងារ USAID ដោយបង្កើនការភ័យខ្លាចក្នុងចំណោមបុគ្គលិកជំនួយនៃការកើនឡើងភាពអត់ឃ្លានបន្ថែមទៀតនៅក្នុងជំរំដ៏ចង្អៀត ដែលពោរពេញទៅដោយមនុស្សយ៉ាងក្រាស់ក្រែលនេះ៕