មន្ត្រីបាននិយាយថា ការវាយប្រហារដោយមីស៊ីលរបស់រុស្សី កាលពីថ្ងៃចន្ទ (ទី២៤ ខែមីនា) បានត្រូវចំតំបន់ដែលមានប្រជាជនច្រើននៃទីក្រុង Sumy ភាគឦសានប្រទេសអ៊ុយក្រែន ដោយបានបណ្ដាលឲ្យមនុស្ស ៨៨នាក់រងរបួស ក្នុងនោះមានកុមារចំនួន ១៧នាក់ផងដែរ ខណៈដែលកិច្ចចរចាបទឈប់បាញ់ បានដំណើរការទៅ។

អភិបាលតំបន់ លោក Volodymyr Artiukh បានប្រកាសពីចំនួនអ្នករងគ្រោះចុងក្រោយបង្អស់ តាមទូរទស្សន៍ជាតិ។ ជាមួយគ្នានេះ លោកបានប្រាប់ថា កុមារជាច្រើននាក់ទៀត បានរួចផុតពីការរងរបួស ខណៈដែលពួកគេត្រូវបានជម្លៀសទៅកាន់ទីជម្រកលាក់ខ្លួនពីការវាយប្រហារតាមផ្លូវអាកាស។

លោក Artiukh បានប្រាប់ទូរទស្សន៍ថា៖ «ពួកគេស្ថិតនៅក្នុងតំបន់ដែលមានប្រជាជនរស់នៅច្រើនកុះករ ដែលរងការវាយប្រហារដោយសត្រូវ»។

លោក Artiukh បានឲ្យដឹងនៅក្នុងវីដេអូមួយនៅមុននេះ ដែលលោកបាននិយាយថា ត្រូវបានគេថតនៅកន្លែងកើតហេតុ ដែលមានផ្សែងខ្មៅហុយទ្រលោម អណ្ដាតភ្លើង និងរថយន្តដែលបង្អួចខាងក្រោយបែកខ្ទេចខ្ទី។ ហើយគេក៏បានឃើញមានផ្សែងហុយចេញពីជាន់ខាងលើនៃប្លុកលំនៅឋានកម្ពស់ប្រាំជាន់នៅក្បែរនោះផងដែរ។

អភិបាលក្រុងស្ដីទីរបស់ទីក្រុង Sumy លោក Artem Kobzar បានឲ្យដឹងនៅលើកម្មវិធីផ្ញើសារ Telegram ថា រោងចក្រឧស្សាហកម្មមួយកន្លែងត្រូវបានវាយប្រហារ ប៉ុន្តែមិនបានបញ្ចេញឈ្មោះរោងចក្រនោះទេ៕