អ្នកវិភាគកុងហ្គោមួយរូប និយាយនៅថ្ងៃអង្គារនេះថា ប្រទេសរ៉្វាន់ដា និងក្រុមឧទ្ទាម M23ទំនងជាដណ្តើមបានដែនដីបន្ថែមទៀតនៅតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ ដើម្បីទទួលបានអនុភាពនៅក្នុងកិច្ចចរចានាពេលអនាគត បើទោះបីជាមានកិច្ចប្រជុំស្វែងរកសន្តិភាពធ្វើម្ចាស់ផ្ទះដោយប្រទេសកាតាកាលពីពេលថ្មីៗនេះ និងសំពាធកើនឡើងពីអន្តរជាតិក៏ដោយ ។

ជាការឆ្លើយតបនឹងស្ថានភាពដ៏ធ្ងន់ធ្ងរនេះ ប្លុកនៅអាហ្វ្រិកខាងត្បូង និងប្លុកអាហ្វ្រិកខាងកើត បានតែងតែអតីតប្រមុខរដ្ឋចំនួន ៥នាក់ រួមទាំងលោក Olusegun Obasanjo មកពីប្រទេសនីហ្សេរីយ៉ា លោក Kgalema Motlanthe មកពីប្រទេសអាហ្វ្រិកខាងត្បូង និងលោក Sahle-Work Zewde មកពីប្រទេសអេត្យូពី ដើម្បីសម្របសម្រួលដំណើរការស្វែងរកសន្តិភាពនៅកុងហ្គោ ។

លោក Jason Stearns គឺជាសាស្រ្តាចារ្យនៅសាកលវិទ្យាល័យ Simon Fraser និយាយថា ប្រទេសរ៉ា្វន់ដា និងក្រុមឧទ្ទាម M23 មាននូវការទាមទារថ្នាក់ជាតិ ពិបាកសម្រេចបានជាមួយនឹងការកាន់កាប់ទឹកដីបច្ចុប្បន្ន ។

លោកថា ពួកគេត្រូវការចូលរួមក្នុងដំណើរការស្វែងសន្តិភាព ប៉ុន្តែពួកគេប្រហែលមិនប្តេជ្ញាចិត្តនោះទេ បង្កការលំបាកសម្រាប់ថ្នាក់ដឹកនាំរបស់រ៉្វាន់ដា ក្នុងការថែរក្សាសុវត្ថិភាពរបស់ពួកគេ ខណៈចូលរួមជម្លោះធ្វើឲ្យមនុស្សរាប់លាននាក់ជម្លៀសខ្លួន ។

ក្រុមឧទ្ទាម M23បានច្រានចោលការអំពាវនាវឲ្យមានបទឈប់បាញ់ បើទោះបីជាកិច្ចប្រជុំកាលពីពេលថ្មីៗនៅក្នុងប្រទេសកាតា រវាងប្រធានាធិបតីកុងហ្គោ លោក Felix Tshisekedi និងប្រធានាធិបតីរ៉្វាន់ដាលោក Paul Kagame ក៏ដោយ ៕