ក្រសួងការបរទេសរុស្ស៊ី បានបញ្ជាក់ច្បាស់ៗកាលពីថ្ងៃអង្គារ (២៥ មីនា) ថា រោងចក្រនុយក្លេអ៊ែរ Zaporizhzhia គឺជារោងចក្ររបស់រុស្ស៊ី ហើយការផ្ទេរការគ្រប់គ្រងរបស់មូលដ្ឋាននេះទៅឱ្យអ៊ុយក្រែន ឬប្រទេសផ្សេងទៀត គឺជារឿងមិនអាចទៅរួចទេ ហើយប្រតិបត្តិការរួមគ្នានៃរោងចក្រនេះ ក៏មិនអាចទទួលយកបានដែរ ព្រោះនោះជារឿងមិនអាចទៅរួចក្នុងការធានាឱ្យត្រឹមត្រូវនូវសុវត្ថិភាពរូបវន្ត និងនុយក្លេអ៊ែររបស់ស្ថានីយ៍។

ក្រសួងបន្តថា តំបន់ Zaporizhzhia ដែលកងកម្លាំងរុស្ស៊ីគ្រប់គ្រងដោយផ្នែក គឺជាតំបន់មួយក្នុងចំណោមបួននៅអ៊ុយក្រែន ដែលត្រូវបានដាក់បញ្ចូលដោយរុស្ស៊ី ដោយសារការបោះឆ្នោតប្រជាមតិដែលបានធ្វើឡើងរយៈពេល ៧ខែ បន្ទាប់ពីប្រតិបត្តិការយោធាពិសេសរបស់ខ្លួន ហើយក្រឹត្យរបស់ប្រធានាធិបតី បានធ្វើឱ្យស្ថានីយនោះជាកម្មសិទ្ធិរបស់រុស្ស៊ីជាផ្លូវការ។

គួរបញ្ជាក់ថា អ៊ុយក្រែន ទាមទារឱ្យស្ថានីយនេះត្រឡប់មកក្រោមដែនសមត្ថកិច្ចរបស់ខ្លួនវិញ ហើយបដិសេធការដាក់បញ្ចូលទឹកដីនោះក្នុងឆ្នាំ២០២២ ថាជារឿងខុសច្បាប់។ សហរដ្ឋអាមេរិក ក៏បានស្នើថាខ្លួនអាចជួយដំណើរការរោងចក្រនុយក្លេអ៊ែរធំជាងគេនៅអឺរ៉ុបមួយនេះ និងអាចដាក់កម្មសិទ្ធិលើរោងចក្រថាមពលនុយក្លេអ៊ែរនានារបស់អ៊ុយក្រែន។

ថ្វីត្បិតតែពេលនេះ រោងចក្រនេះមិនផលិតថាមពលអគ្គិសនីក៏ដោយ ក៏អង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានដាក់អ្នកត្រួតពិនិត្យឱ្យឈរជើងនៅទីនោះ ដូចដែលខ្លួនបានធ្វើនៅគ្រប់ទីតាំងថាមពលនុយក្លេអ៊ែរទាំងអស់របស់អ៊ុយក្រែន៕