ទំនុកចិត្តអ្នកប្រើប្រាស់របស់សហរដ្ឋអាមេរិក បានធ្លាក់ចុះដល់កម្រិតទាបបំផុតក្នុងរយៈពេលជាង ៤ឆ្នាំក្នុងខែមីនានេះ ដោយក្រុមគ្រួសារមានការភ័យខ្លាចថានឹងមានវិបត្តិសេដ្ឋកិច្ចនាពេលអនាគត និងអតិផរណាខ្ពស់ ដោយសារតែការដំឡើងពន្ធរបស់លោកប្រធានាធិបតី Donald Trump។

ក្រុមប្រឹក្សាសន្និសីទ បាននិយាយកាលពីថ្ងៃអង្គារ (២៥ មីនា) ថា ការឆ្លើយតបចំពោះការស្ទង់មតិមួយបង្ហាញថា "ក្ដីបារម្ភពីផលប៉ះពាល់គោលនយោបាយពាណិជ្ជកម្ម និងពន្ធជាពិសេស កំពុងកើនឡើង" ដោយ "មានឯកសារយោងច្រើនជាងធម្មតាលើភាពមិនច្បាស់លាស់សេដ្ឋកិច្ច និងគោលនយោបាយ"។

ការដំឡើងពន្ធមិនទៀងទាត់ម្ដងហើយម្តងទៀតរបស់លោក Trump ត្រូវបានសេដ្ឋវិទូព្រមានថាជាការសាបព្រួសភាពច្របូកច្របល់ និងភាពមិនប្រាកដប្រជា ដែលពួកគេនិយាយថា កំពុងធ្វើឱ្យលំបាកដល់អាជីវកម្មក្នុងការរៀបចំផែនការខាងមុខ ដើម្បីទប់ទល់ការបំផ្លាញសេដ្ឋកិច្ច។ អតិផរណានៅតែជាកង្វល់ចម្បង ហើយការភ័យខ្លាចរឿងពន្ធកាន់តែកើនឡើង ជាមួយនឹងសន្ទស្សន៍ទំនុកចិត្តអ្នកប្រើប្រាស់ធ្លាក់ចុះ ៧,២ពិន្ទុបន្ថែម ដល់តួលេខ ៩២,៩ពិន្ទុ ក្នុងខែនេះ ដែលជាកម្រិតទាបបំផុតតាំងពីខែមករា ឆ្នាំ២០២១។

លើសពីនេះ លោក Trump កាលពីថ្ងៃចន្ទ បានចង្អុលបង្ហាញថា មិនមែនរាល់ពន្ធដែលលោកបានគម្រាមកំហែង នឹងត្រូវដាក់នៅថ្ងៃទី០២ ខែមេសានោះទេ ហើយប្រទេសមួយចំនួនអាចនឹងត្រូវបន្ធូរបន្ថយ ប៉ុន្តែក្នុងពេលជាមួយគ្នានេះក៏បាននិយាយថា ពន្ធបន្ថែមលើរថយន្តនាំចូល នឹងមកដល់ឆាប់ៗ ដែលបង្កការភាពច្របូលច្របល់កាន់តែខ្លាំង៕