ថ្លៃសេវាដែលសហរដ្ឋអាមេរិក បានស្នើឡើងសំដៅលើនាវាផលិតដោយចិន កំពុងបង្កើនការព្រួយបារម្ភយ៉ាងខ្លាំងក្នុងចំណោមអ្នកជំនាញខាងពាណិជ្ជកម្ម និងភស្តុភារ ដែលព្រមានពីលទ្ធភាពនៃការរំខានធ្ងន់ធ្ងរចំពោះខ្សែច្រវ៉ាក់ផ្គត់ផ្គង់សកល និងផលប៉ះពាល់អវិជ្ជមានយ៉ាងរង្គោះរង្គើសម្រាប់សេដ្ឋកិច្ចអាមេរិកផ្ទាល់។

នៅសប្ដាហ៍នេះ ការិយាល័យតំណាងពាណិជ្ជកម្មសហរដ្ឋអាមេរិក (USTR) កំពុងបើកសវនាការសាធារណៈសម្រាប់អ្នកពាក់ព័ន្ធ ដើម្បីថ្លឹងថ្លែងលើសំណើរបស់រដ្ឋបាលលោកប្រធានាធិបតី Donald Trump ដែលអាចដាក់ថ្លៃសេវារហូតដល់ ១,៥លានដុល្លារអាមេរិក លើនាវាដែលភ្ជាប់ជាមួយចិន ចូលចតនៅកំពង់ផែសហរដ្ឋអាមេរិក។

ប្រហែល ៩០% នៃការនាំចូលរបស់អាមេរិកទាំងអស់ បានឆ្លងកាត់កំពង់ផែសមុទ្រ ហើយនាវាភាគច្រើនត្រូវបានសាងសង់ គ្រប់គ្រង ឬដំណើរការដោយចិន។ ក្រុមអ្នកជំនាញបារម្ភថា ការចំណាយបន្ថែមទៀត អាចបង្ខំក្រុមហ៊ុនដឹកជញ្ជូននានាឱ្យងាកទៅរកកិច្ចប្រឹងប្រែងសន្សំការចំណាយ ដោយការរឹតបន្តឹងការចូលចតរបស់ពួកគេទៅកាន់កំពង់ផែសមុទ្រសំខាន់ៗរបស់អាមេរិក ដូចជាផែក្រុង Los Angeles ជាដើម ហើយនោះអាចមានផលវិបាកធំសម្រាប់អ្នកនាំចេញនៅតាមតំបន់ជនបទ។

ក្រសួងពាណិជ្ជកម្មចិនបាននិយាយថា ការស៊ើបអង្កេតមាត្រាទី៣០១ របស់សហរដ្ឋអាមេរិក លើដែនសមុទ្ររបស់ចិន គឺជាទង្វើធម្មតានៃលទ្ធិឯកតោភាគីនិយម និងគាំពារនិយម ដែលបំពានយ៉ាងធ្ងន់ធ្ងរទៅលើច្បាប់របស់អង្គការពាណិជ្ជកម្មពិភពលោក WTO ហើយបានព្រមានថា សំណើរបស់អាមេរិក ក្នុងការយកថ្លៃកំពង់ផែលើនាវារបស់ចិន អាចនឹងដុតបំផ្លាញអាមេរិកខ្លួនឯងផ្ទាល់៕