កូរ៉េខាងជើង ពុំមានបំណងបោះបង់ចោលកម្មវិធីអាវុធនុយក្លេអ៊ែររបស់ខ្លួនទេ ហើយហាក់បីដូចជាបានត្រៀមលក្ខណៈរួចជាស្រេចដើម្បីអនុវត្តការសាកល្បងនុយក្លេអ៊ែរតាមរយៈការជូនដំណឹងរយៈពេលខ្លី នេះបើយោងតាមការវាយតម្លៃស៊ើបការណ៍សម្ងាត់ថ្មីរបស់សហរដ្ឋអាមេរិក ដោយផ្តល់នូវចក្ខុវិស័យពីវិធីសាស្រ្តដែលរដ្ឋបាលលោកប្រធានាធិបតីអាមេរិក Donald Trump អាចទប់ទល់ការគំរាមកំហែងរបស់កូរ៉េខាងជើង។

ការវាយតម្លៃការគំរាមកំហែងប្រចាំឆ្នាំ២០២៥ ដែលចេញផ្សាយដោយការិយាល័យនាយកស៊ើបការណ៍សម្ងាត់ជាតិ (ODNI) កាលពីថ្ងៃអង្គារ (២៥ មីនា) នេះបានព្រមានថា មេដឹកនាំកូរ៉េខាងជើង លោក Kim Jong Un នឹងបន្តស្វែងរក "សមត្ថភាពយោធាជាយុទ្ធសាស្ត្រ និងសាមញ្ញ" ដើម្បីកំណត់គោលដៅលើអាមេរិក និងសម្ព័ន្ធមិត្តរបស់ខ្លួន ក្នុងបំណងបំផ្លាញអំណាចរបស់ទីក្រុងវ៉ាស៊ីនតោន និងបង្កើតបរិយាកាសសន្តិសុខក្នុងតំបន់ឡើងវិញ។

ទីក្រុងវ៉ាស៊ីនតោន ក៏បានព្រមាននៅក្នុងរបាយការណ៍នោះថា កូរ៉េខាងជើង "ប្រហែលជាត្រៀមរួចរាល់ហើយក្នុងការធ្វើតេស្តនុយក្លេអ៊ែរ" និងបន្តការបាញ់សាកល្បងមីស៊ីលបាលីស្ទីកអន្តរទ្វីប (ICBM) ដែលមានសមត្ថភាពគំរាមកំហែងដល់ដីគោករបស់សហរដ្ឋអាមេរិក។

ការវាយតម្លៃនោះបន្ថែមថា ទីក្រុងពញយុងយ៉ាងក៏កំពុងបង្កើនឃ្លាំងផ្ទុកក្បាលគ្រាប់នុយក្លេអ៊ែររបស់ខ្លួន និងការកែលម្អបច្ចេកវិទ្យាមីស៊ីលបាលីស្ទិក រួមទាំងការបាញ់បង្ហោះចំនួន ៣ដងរួចមកហើយក្នុងឆ្នាំ២០២៤ នៃអ្វីដែលខ្លួនបានអះអាងថាជាមីស៊ីលបាលីស្ទិករយៈចម្ងាយមធ្យម ដែលបំពាក់ដោយក្បាលគ្រាប់ល្បឿនលឿនជាងសំឡេង៕