ក្រសួងពាណិជ្ជកម្មសហរដ្ឋអាមេរិក បាននិយាយថា ទីក្រុងវ៉ាស៊ីនតោន បានបន្ថែមអង្គភាពរាប់សិបស្ថាប័នទៅក្នុងបញ្ជីខ្មៅពាណិជ្ជកម្ម កាលពីថ្ងៃអង្គារ (២៥ មីនា) ដែលជាផ្នែកមួយដើម្បីរំខានដល់បញ្ញាសិប្បនិម្មិត AI របស់ទីក្រុងប៉េកាំង និងទប់សមត្ថភាពកុំព្យូទ័រកម្រិតខ្ពស់ ដែលកំពុងដើរទៅមុខយ៉ាងលឿនរបស់ចិន។

សកម្មភាពនេះប៉ះពាល់ដល់អង្គភាពចំនួន៨០ មកពីប្រទេសជាច្រើន រួមទាំងចិន អារ៉ាប់រួម និងអ៊ីរ៉ង់ ដោយក្រសួងបានលើកឡើងពី "សកម្មភាពរបស់ពួកគេផ្ទុយនឹងសន្តិសុខជាតិ និងគោលនយោបាយការបរទេសរបស់សហរដ្ឋអាមេរិក"។ ស្ថាប័ន ដែលបន្ថែមទៅក្នុង "បញ្ជីអង្គភាព" នោះ ត្រូវបានដាក់កំហិតពីការទទួលបានឧបករណ៍ និងបច្ចេកវិទ្យារបស់អាមេរិក ដោយគ្មានការអនុញ្ញាតពីរដ្ឋាភិបាល។

ស្ថានទូតចិនក្នុងទីក្រុងវ៉ាស៊ីនតោន បាននិយាយថា សហរដ្ឋអាមេរិកបាន "ពង្រីកគំនិតសន្តិសុខជាតិរបស់ខ្លួនម្តងហើយម្តងទៀត និងបំពានអំណាចរដ្ឋដើម្បីតាមប្រមាញ់ក្រុមហ៊ុនចិន"។

អ្នកនាំពាក្យស្ថានទូតចិន លោក Liu Pengyu និយាយថា "ទីក្រុងប៉េកាំង ប្រឆាំងយ៉ាងម៉ឺងម៉ាត់ចំពោះទង្វើអាមេរិកទាំងនេះ ហើយទាមទារឱ្យបញ្ឈប់ជាបន្ទាន់នូវការប្រើប្រាស់បញ្ហាពាក់ព័ន្ធនឹងយោធា ធ្វើជាលេសនយោបាយ និងការប្រើពាណិជ្ជកម្ម និងបច្ចេកវិទ្យាជាអាវុធ ហើយសូមបញ្ឈប់សកម្មភាពតាមប្រមាញ់ក្រុមហ៊ុនចិននេះជាបន្ទាន់"៕