ការិយាល័យអភិបាលក្នុងតំបន់បាននិយាយនៅលើបណ្ដាញសង្គមហ្វេសប៊ុកថា ជនជាតិរុស្ស៊ី ៦នាក់ បានស្លាប់ កាលពីថ្ងៃព្រហស្បតិ៍ (២៧ មីនា) ហើយអ្នកទេសចរបរទេស ៣៩នាក់ផ្សេងទៀត ត្រូវបានជួយសង្គ្រោះ នៅពេលដែលនាវាមុជទឹកមើលទេសភាពបាតសមុទ្រ បានលិចចេញពីរមណីយដ្ឋានសមុទ្រក្រហមអេហ្ស៊ីប Hurghada ដោយបន្ថែមថា ពុំមានអ្នកដំណើរ ឬបុគ្គលិកបាត់ខ្លួនទេ។

អភិបាលសមុទ្រក្រហមបាននិយាយថា នាវាមុជទឹកដែលមានឈ្មោះថា "Sindbad" បានដឹកមនុស្ស ៥០នាក់នៅលើនោះ ដោយមានអ្នកទេសចរ ៤៥នាក់ ដែលមានសញ្ជាតិផ្សេងៗគ្នាមកពីរុស្ស៊ី ឥណ្ឌា ន័រវេស និងស៊ុយអែត ព្រមទាំងសមាជិកបុគ្គលិកអេហ្ស៊ីប ៥នាក់។

យោងតាមគេហទំព័ររបស់ក្រុមហ៊ុនបានឱ្យដឹងថា នាវាមុជទឹកនេះត្រូវបានបំពាក់ដោយរន្ធធំៗ ដើម្បីអោយអ្នកដំណើរបានមើលឃើញផ្កាថ្ម និងជីវិតសត្វសមុទ្រដ៏អស្ចារ្យរបស់សមុទ្រក្រហម ហើយអាចចុះដល់ជម្រៅ ២៥ម៉ែត្រ។ យានដ៏រីករាយនេះ គឺខុសគ្នាឆ្ងាយពីនាវាមុជទឹកផ្សងព្រេង ដែលបានលិចជម្រៅរាប់ពាន់ម៉ែត្រក្នុងខែមិថុនា ឆ្នាំ២០២៣ ខាងក្រោមមហាសមុទ្រអាត្លង់ទិក ក្បែរទីតាំងកប៉ាល់ទីតានិច។

អាជ្ញាធរសមុទ្រក្រហមបាននិយាយថា ក្រុមការងាររអេហ្ស៊ីប កំពុងស៊ើបអង្កេតជាមួយសមាជិកនាវិក ដើម្បីកំណត់ពីមូលហេតុនៃការលិចនាវាមុជទឹកនេះ។ សមុទ្រក្រហមគឺជាមជ្ឈមណ្ឌលដ៏សំខាន់មួយសម្រាប់ឧស្សាហកម្មទេសចរណ៍ដ៏សំខាន់របស់អេហ្ស៊ីប ដែលជាសសរស្តម្ភនៃសេដ្ឋកិច្ច ដោយក្នុងនោះអ្នកទេសចររុស្ស៊ីដើរតួជាផ្នែកមួយនៃកំណើនការកម្សាន្តបាតសមុទ្រដ៏ផ្សងព្រេងបែបនេះ៕