បណ្ដាក្រុមសកម្មប្រយុទ្ធប៉ាឡេស្ទីន កាលពីថ្ងៃព្រហស្បតិ៍ (២៧ មីនា) បានគំរាមដាក់ទណ្ឌកម្មសម្រាប់ "អ្នកសហការ" ដោយការបន្ថែមគោលដៅលើអ៊ីស្រាអែល បន្ទាប់ពីការតវ៉ាដ៏ធំជាលើកដំបូងប្រឆាំងនឹងសង្រ្គាមនៅក្នុងតំបន់ហ្កាហ្សា និងប្រឆាំងការគ្រប់គ្រងរបស់ក្រុមហាម៉ាស ដោយហៅបាតុកម្មនោះថាជាការជួយដល់អ៊ីស្រាអែល។

ប្រជាជនប៉ាឡេស្ទីនរាប់រយនាក់ បានប្រមូលផ្តុំគ្នាក្នុងប៉ុន្មានថ្ងៃថ្មីៗនេះនៅភាគខាងជើង និងកណ្តាលហ្កាហ្សា ដោយអ្នកខ្លះស្រែកថា "ហាម៉ាសចេញទៅ" នៅក្នុងការបង្ហាញដ៏កម្រមួយនៃគំនិតប្រឆាំងចំពោះក្រុមសកម្មប្រយុទ្ធ ដែលការវាយឆ្មក់របស់ពួកគេលើអ៊ីស្រាអែលនៅខែតុលា ឆ្នាំ២០២៣ បានបង្កឱ្យមានសង្រ្គាមដ៏បង្ហូរឈាមនៅក្នុងតំបន់ហ៊ុមព័ទ្ធនេះ។ បាតុកម្មបន្ថែមទៀតដែលអ៊ីស្រាអែលសាទរ ត្រូវបានគ្រោងធ្វើឡើង។

សេចក្តីថ្លែងការណ៍របស់ "បក្សពួកនៃចលនាតស៊ូ" ដែលជាក្រុមឆ័ត្រ រួមទាំងក្រុមហាម៉ាសផងនោះ បានគំរាមដាក់ទណ្ឌកម្មចំពោះមេដឹកនាំនៃ "ចលនាគួរឱ្យសង្ស័យ" ដែលប៉ាឡេស្ទីនបានធ្វើឡើងដោយការដើរដង្ហែតវ៉ាតាមដងផ្លូវ។

មន្ត្រីក្រុមហាម៉ាស និយាយថា ប្រជាជនមានសិទ្ធិតវ៉ា ប៉ុន្តែការប្រមូលផ្តុំគ្នាមិនគួរត្រូវបានកេងប្រវ័ញ្ចសម្រាប់បំណងនយោបាយនោះទេ។ បាតុករប៉ាឡេស្ទីននិយាយថា ពួកគេមិនមែនប្រឆាំងចលនាតស៊ូទេ ប៉ុន្តែគឺប្រឆាំងនឹងសង្រ្គាម និងការបង្ហូរឈាមនេះ ខណៈរដ្ឋមន្រ្តីការពារជាតិអ៊ីស្រាអែល លោក Israel Katz បានជំរុញពលរដ្ឋហ្កាហ្សា ឱ្យបន្តសម្ដែងការមិនពេញចិត្តរបស់ពួកគេ៕