នៅថ្ងៃសុក្រ ទី២៨ ខែមីនាសប្ដាហ៍នេះ ក្រុមអ្នកពន្លត់អគ្គិភ័យ បានប្រជែងកម្លាំងរាលដាលនៃអណ្ដាតភ្លើងនៅកន្លែងភ្លើងឆេះព្រៃធំៗក្នុងតំបន់ភាគអាគ្នេយ៍ ដែលត្រូវបានជួយដោយការមើលឃើញកាន់តែប្រសើរឡើង និងសីតុណ្ហភាពត្រជាក់ខ្លាំងពីភ្លៀងធ្លាក់ពេលយប់ ខណៈប្រទេសនេះកំពុងតតាំងនឹងគ្រោះមហន្តរាយភ្លើងឆេះព្រៃដ៏ធ្ងន់ធ្ងរបំផុត ដែលបានឆក់យកជីវិតមនុស្ស២៨នាក់មកទល់ពេលនេះ។

យោងតាមទីភ្នាក់ងារឆ្លើយតបគ្រោះមហន្តរាយរបស់រដ្ឋាភិបាលបានឱ្យដឹងថា ដោយសារឥទ្ធិពលខ្យល់បក់ខ្លាំង និងលក្ខខណ្ឌស្ងួត រលកនៃភ្លើងឆេះព្រៃបានបំផ្លិចបំផ្លាញតំបន់នានាចាប់តាំងពីថ្ងៃសុក្រសប្ដាហ៍មុន ដោយបានបណ្ដាលឱ្យមនុស្ស ៣៧ នាក់រងរបួស និងបង្ខំឱ្យមនុស្សប្រហែល ៣៨.០០០នាក់ ត្រូវភៀសខ្លួនពីផ្ទះសម្បែង ។

ទីភ្នាក់ងារនេះបាននិយាយនៅព្រឹកនេះថា ផ្ទៃដីព្រៃឈើប្រហែល ៤៨.០០០ហិកតា ស្មើនឹងប្រហែល ៨០ ភាគរយនៃទំហំរបស់រដ្ឋធានីសេអ៊ូល ត្រូវបានឆេះខ្ទេចខ្ទី។

វាមានទំហំជិត២៥.០០០ហិចតា ច្រើនជាង២៣.៧៩៤ ហិចតា ដែលរងការខូចខាតដោយភ្លើងឆេះព្រៃនៅឆ្នេរសមុទ្រភាគខាងកើតក្នុងឆ្នាំ២០០០ ដែលជាគ្រោះមហន្តរាយធម្មជាតិធ្ងន់ធ្ងរបំផុតក្នុងប្រវត្តិសាស្ត្ររបស់ប្រទេសនៅពេលនោះ។

លោក Lim Sang-seop ប្រធានសេវាព្រៃឈើកូរ៉េ (KFS) បានប្រាប់អ្នកយកព័ត៌មានថា ពួកលោកគ្រោងប្រើប្រាស់ធនធានដែលមានទាំងអស់ដើម្បីពន្លត់អណ្តាតភ្លើងដ៏ធំក្នុងពេលច្ចុប្បន្ននេះ។

យោងតាមលោក Lim បានឱ្យដឹងថា ការមើលឃើញប្រសើរឡើង និងសីតុណ្ហភាពត្រជាក់ពីភ្លៀងធ្លាក់នៅពេលយប់បានបង្កើតលក្ខខណ្ឌអំណោយផល ដើម្បីគ្រប់គ្រងអណ្តាតភ្លើង ។

លោកបានបន្ថែមថា ពួកលោកនឹងខិតខំប្រឹងប្រែងឱ្យអស់ពីសមត្ថភាពដោយដាក់ពង្រាយឧទ្ធម្ភាគចក្រ បុគ្គលិក និងធនធានផ្សេងទៀត ដើម្បីទប់ស្កាត់ការឆេះរាលដាលនៃចំហេះព្រៃនេះ៕