សង្គ្រាមអ៊ុយក្រែន ការបង្កើនការចំណាយលើវិស័យការពារជាតិរបស់អឺរ៉ុប និងកំណើនតម្រូវការ រួមទាំងកង្វះខាតសកល ទំនងជាពន្យឺតផែនការរបស់អូស្ត្រាលី ក្នុងការអភិវឌ្ឍសមត្ថភាពសមាសធាតុមីស៊ីលផ្ទាល់ខ្លួនរបស់ខ្លួន ខណៈប្រទេសនេះជំរុញទៅមុខជាមួយនឹងកិច្ចខិតខំប្រឹងប្រែងតម្លៃរាប់ពាន់លានដុល្លារ ដើម្បីទទួលបានមីស៊ីលវាយប្រហាររយៈចម្ងាយឆ្ងាយ។

លោកនាយករដ្ឋមន្ត្រី Anthony Albanese បានសន្យាថា នឹងផ្តល់ប្រាក់ចំនួន ៧៤ពាន់លានដុល្លារអូស្ត្រាលី (៤៧ ពាន់លានដុល្លារអាមេរិក) កាលពីឆ្នាំមុន សម្រាប់ការទិញមីស៊ីលបន្ថែម រួមទាំងប្រាក់ ២១ពាន់លានដុល្លារអូស្ត្រាលី ដើម្បីបង្កើតសហគ្រាសអាវុធប្រើប្រព័ន្ធទូរបញ្ជា និងអាវុធផ្ទុះនៅអូស្ត្រាលី ខណៈរដ្ឋាភិបាលការងាររបស់លោក បានកែប្រែយុទ្ធសាស្ត្រការពាររបស់ប្រទេស ដើម្បីឆ្លើយតបទៅនឹងការកសាងយោធារបស់ចិន។

ជាការទប់ទល់ប្រឆាំងនឹងកង្វះខាតផ្គត់ផ្គង់សកល អូស្ត្រាលីបានចុះហត្ថលេខាលើការបញ្ជាទិញភ្លាមៗជាមួយក្រុមហ៊ុនការពារជាតិអាមេរិក និងអឺរ៉ុប រួមទាំងក្រុមហ៊ុន Lockheed Martin ក្រុមហ៊ុន Kongsberg និង Raytheon ផ្ដោតលើមីស៊ីលរយៈចម្ងាយឆ្ងាយល្បឿងលឿនជាងសំឡេង ដែលអូស្ត្រាលី ចង់បានដើម្បីការពារព្រំដែនខាងជើងរបស់ខ្លួន។

ក្រសួងការពារជាតិអូស្ត្រាលី និយាយថា ការផលិតមីស៊ីលប្រព័ន្ធទូរបញ្ជាដំបូងនៅអូស្ត្រាលី ដោយក្រុមហ៊ុន Kongsberg នៃមីស៊ីលវាយប្រហាររួម និងមីស៊ីលវាយប្រហារជើងទឹក នឹងចាប់ផ្តើមនៅឆ្នាំ២០២៧ ខណៈក្រុមហ៊ុន Lockheed Martin រំពឹងថានឹងផលិតប្រព័ន្ធរ៉ូកែតពហុជំនាញ (GMLRS) នៅអូស្ត្រាលី ក្នុងឆ្នាំនេះ៕