ប្រធានាធិបតីរុស្ស៊ី លោក Vladimir Putin នៅថ្ងៃព្រហស្បតិ៍ (២៧ មីនា) សប្ដាហ៍នេះ បានចុះក្រឹត្យមួយដែលអនុញ្ញាតឱ្យដាក់ដំណើរការនាវាមុជទឹកដើរដោយថាមពលនុយក្លេអ៊ែរ បំពាក់ដោយមីស៊ីលល្បឿនលឿនជាងសំឡេង ហ្សើខន (Zircon) ដែលអាចធ្វើដំណើរក្នុងល្បឿនយ៉ាងលឿនច្រើនដងជាងសំឡេង នៅក្នុងសមត្ថភាពមួយដែលពិបាកទប់ទល់យ៉ាងខ្លាំង។

ទីភ្នាក់ងារសារព័ត៌មានរុស្ស៊ី ដោយយោងទៅលើវីដេអូពីកំពង់ផែអាកទិក នៃទីក្រុង មើម៉ាន (Murmansk) បាននិយាយថា លោក Putin បានចេញក្រឹត្យអនុញ្ញាតឱ្យដំណើរការនាវាឈ្មោះថា ភើម (Perm) ដែលដាក់តាមទីក្រុងមួយនៅតំបន់អ៊ូរ៉ាល់ (Ural) ។

សារព័ត៌មានរុស្ស៊ី បានដកស្រង់ឯកសារពាក់ព័ន្ធ ដោយនិយាយថា យាន Perm គឺជានាវាមុជទឹកដើរដោយថាមពលនុយក្លេអែរដំបូងគេ ដែលត្រូវបានបំពាក់ដោយមីស៊ីល Zircon ជាលក្ខណៈស្តង់ដារ។

មីស៊ីល Zircon នេះមានរយៈចម្ងាយ ៩០០គីឡូម៉ែត្រ ហើយល្បឿនរបស់មីស៊ីលលឿនខ្លាំង ដែលធ្វើឱ្យគោលដៅពិបាកការពារខ្លួន។ នាវា Perm គឺជានាវាមុជទឹកទី៦ នៅក្នុងកម្រិត យ៉ាសិន (Yasen) និង យ៉ាស៊ិន-អ៊ឹម (Yasen-M) របស់រុស្ស៊ី ដែលត្រូវបានសាងសង់ដោយមូលដ្ឋានផលិតនាវា សេវម៉ាស (Sevmash) នៅជិតក្រុង Murmansk៕