សារព័ត៌មាន Thai PBS បានរាយការណ៍ថា មេដឹកនាំយោធាមីយ៉ាន់ម៉ា លោកឧត្តមសេនីយ Min Aung Hlaing ត្រូវបានគេរំពឹងថានឹងធ្វើដំណើរទស្សនកិច្ចដ៏កម្រដើម្បីទៅចូលរួមកិច្ចប្រជុំកំពូលថ្នាក់តំបន់មួយនៅទីក្រុងបាងកក ប្រទេសថៃ ក្នុងខែមេសា ខាងមុខនេះ ដែលជាដំណើរទស្សនកិច្ចលើកដំបូងរបស់លោកទៅកាន់រដ្ឋសមាជិកអាស៊ាន ចាប់តាំងពីឆ្នាំ២០២១ មក។

ដោយសម្អាងដល់ "ប្រភពជាន់ខ្ពស់" សារព័ត៌មានថៃនោះបាននិយាយថា លោក Min Aung Hlaing នឹងចូលរួមក្នុងកិច្ចប្រជុំកំពូលគំនិតផ្ដួចផ្ដើមឆក Bengal លើកទី៦ សម្រាប់បច្ចេកទេសពហុវិស័យ និងកិច្ចសហប្រតិបត្តិការសេដ្ឋកិច្ច ហៅកាត់ថា BIMSTEC នៅទីក្រុងបាងកក នៅថ្ងៃទី០៣-០៤ ខែមេសា ខាងមុខ។ គួរឱ្យដឹងថា BIMSTEC ជាក្រុមក្នុងតំបន់ ដែលរួមមានឥណ្ឌា ស្រីលង្កា បង់ក្លាដែស ប៊ូតាន មីយ៉ាន់ម៉ា នេប៉ាល់ និងថៃ មានគោលបំណងជំរុញកំណើនសេដ្ឋកិច្ច និងកិច្ចសហប្រតិបត្តិការ។

សារព័ត៌មានថៃរាយការណ៍ថា កិច្ចប្រជុំកំពូលនេះក៏នឹងរួមបញ្ចូលកិច្ចប្រជុំទ្វេភាគីជាបន្តបន្ទាប់ ហើយទស្សនកិច្ចនេះនឹងក្លាយជាជ័យជម្នះខាងការទូតសម្រាប់របបសឹករបស់មីយ៉ាន់ម៉ា ដែលបានប្រឈមភាពឯកោអន្តរជាតិ ចាប់តាំងពីការដណ្តើមអំណាចក្នុងរដ្ឋប្រហារនៅខែកុម្ភៈ ឆ្នាំ២០២១។

អាស៊ាន បានរារាំងអ្នកតំណាងរបបសឹកមិនឱ្យចូលរួមកិច្ចប្រជុំកម្រិតខ្ពស់ តាំងពីចុងឆ្នាំ២០២១មក ដែលជាការសម្រេចចិត្តមួយត្រូវបានបញ្ជាក់ម្តងទៀតក្នុងកិច្ចប្រជុំរដ្ឋមន្ត្រីការបរទេសកាលខែមករា។ លោក Min Aung Hlaing បានធ្វើទស្សនកិច្ចទៅក្រៅប្រទេសតិចតួចណាស់តាំងពីរដ្ឋប្រហារមក។ ដំណើរចុងក្រោយរបស់លោកទៅកាន់រដ្ឋសមាជិកអាស៊ាន គឺនៅក្នុងខែមេសា ឆ្នាំ២០២១ នៅពេលលោកចូលរួមកិច្ចប្រជុំកំពូលបន្ទាន់មួយក្នុងទីក្រុងហ្សាកាតា ដោយបង្កើតផែនការសន្តិភាព ៥ចំណុចរបស់ប្លុក ដែលនៅតែមិនទាន់បានអនុវត្តនៅឡើយ៕