ភ្លៀងធ្លាក់ បានជួយទប់ស្កាត់ចំហេះព្រៃនៅក្រុង Imabari ក្នុងខេត្តអឺហ៊ីម៉េ(Ehime) ភាគខាងលិចប្រទេសជប៉ុន។ តំបន់នេះ មានភ្លៀងធ្លាក់លើកដំបូងចាប់តាំងពីអណ្តាតភ្លើងបានចាប់ផ្តើមឆេះរាលដាលកាលពីថ្ងៃអាទិត្យ។ ដីល្បប់ត្រូវបានគេឃើញនៅតាមផ្លូវ ក្បែរអគារដែលរងការបំផ្លាញដោយអគ្គិភ័យនៅព្រឹកថ្ងៃសុក្រនេះ។

ខ្យល់សំណើម កំពុងបក់នៅជុំវិញទីតាំងនោះ ហើយក្លិនឈ្ងៀមក៏ថយចុះ។ មន្ត្រីនៃទីស្នាក់ការកណ្តាលឆ្លើយតបគ្រោះមហន្តរាយរបស់ទីក្រុង បាននិយាយថា គ្មានអគ្គិភ័យ ឬផ្សែង ត្រូវបានបញ្ជាក់នៅជុំវិញទីតាំងចំហេះព្រៃនោះទេ គិតត្រឹមព្រឹកថ្ងៃសុក្រនេះ។

ប៉ុន្តែពួកគេនិយាយថា ភ្លើងព្រៃនៅមិនទាន់រលត់ទាំងស្រុងនៅឡើយទេ ខណៈការស្ទង់មើលពីលើអាកាសដោយយានដ្រូន បានរកឃើញប្រភពកម្តៅជាច្រើន។ ផ្ទៃដីប្រមាណ ៤៤២ ហិកតា ត្រូវបានភ្លើងឆាបឆេះគិតត្រឹមរសៀលថ្ងៃព្រហស្បតិ៍ ម្សិលមិញ។ សំណង់សរុបចំនួន ២១កន្លែង រួមមានលំនៅឋាន និងឃ្លាំង បានរងការបំផ្លាញ។

អភិបាលក្រុង Imabari លោក Tokunaga Shigeki បាននិយាយនៅក្នុងកិច្ចប្រជុំឆ្លើយតបគ្រោះមហន្តរាយកាលពីថ្ងៃព្រហស្បតិ៍ថា ការរាលដាលនៃចំហេះព្រៃត្រូវបានគ្រប់គ្រង។ ទីក្រុងនេះ បានចេញបទទបញ្ជាជម្លៀសមនុស្សជិត៦.០០០នាក់ ហើយទីក្រុង Saijo ដែលនៅជិតខាងក៏បានចេញបញ្ជាជម្លៀស ប្រជាជនសម្រាប់តំបន់មួយចំនួនផងដែរ ខណៈទីជម្រកកំពុងដាក់មនុស្ស ១២៣នាក់។