បាល់ទាត់៖ ក្លិបអធិរាជដំរីឦសានបានប្រកាសជ្រើសរើសកីឡាករជាច្រើនរូប ដើម្បីត្រៀមចូលរួមប្រកួតពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ខេត្ត) នាឆ្នាំ២០២២ ខាងមុខ។ តាមការបញ្ជាក់របស់ក្លិបមានមូលដ្ឋាននៅខេត្តរតនៈគិរីនេះ ការប្រកាសជ្រើសរើសកីឡាករនេះគឺដើម្បីឆ្លើយតបនឹងភាពរីកចម្រើន និងការអភិវឌ្ឍន៍លើវិស័យបាល់ទាត់ក្នុងខេត្ត ដែលកំពុងផ្ដោតការបណ្ដុះបណ្ដាលធនធានកីឡាករគឺជាកត្ដាចាំបាច់។
អាស្រ័យហេតុនេះ ក្លិបអធិរាជដំរីឦសានបានបើកឱកាសដល់យុវជនដែលស្រលាញ់ចូលចិត្ត និងមានឆន្ទៈខ្ពស់លើវិស័យបាល់ទាត់ ពិសេសអ្នកខេត្តរតនគិរីចូលរួមជាមួយក្លិបឲ្យបានច្រើនកុះករ ដើម្បីប្រមូលផ្ដុំហ្វឹកហាត់ត្រៀមការប្រកួតនានានៅថ្ងៃខាងមុខ។ ចំពោះលក្ខខណ្ឌនៃការជ្រើសរើសនេះដែរ ក្លិបបានកំណត់កីឡាករចាប់ពីអាយុ ១៦ឆ្នាំឡើងដោយភ្ជាប់មកជាមួយនូវសំបុត្រកំណើត ឬអត្តសញ្ញាណប័ណ្ឌ រូបថត 4x6 ២សន្លឹក ហើយកីឡាករត្រូវមានក្រមសីលធម៌ និងការទទួលខុសត្រូវខ្ពស់ ខណៈកីឡាករមានបទពិសោធន៍កាន់តែប្រសើរ។ ទីតាំងចុះឈ្មោះគឺស្ថិតនៅភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី ដោយការទទួលពាក្យនេះនឹងបញ្ចប់នៅថ្ងៃទី៤ ខែធ្នូខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
