លោកប្រធានាធិបតី វ្ល៉ាឌីមៀ ពូទីន បានថ្លែងនៅក្នុងកិច្ចប្រជុំមួយស្តីពីការអភិវឌ្ឍតំបន់អាកទិកថា ប្រទេស រុស្ស៊ីប្រឈមមុខការងារទ្រង់ទ្រាយធំ នៅតំបន់អាកទិក ហើយនឹងត្រូវពង្រឹងហេដ្ឋារចនាសម្ព័ន្ធដឹកជញ្ជូន និង ភ័ស្តុភារ ការពារប្រព័ន្ធអេកូឡូស៊ីដ៏ផុយស្រួយ និងធានាបាននូវលក្ខខណ្ឌរស់នៅប្រកបដោយផាសុកភាព។

លោកប្រធានាធិបតី បាននិយាយថា៖«នៅទីនេះ គឺនៅក្នុងតំបន់អាក់ទិក ដែលជាតំបន់យុទ្ធសាស្ត្រ និងសំខាន់នេះ យើងកំពុងរ៉ាប់រងកិច្ចការដ៏ធំ និងស្មុកស្មាញ។ យើងត្រូវពង្រឹងការដឹកជញ្ជូន ហេដ្ឋារចនាសម្ព័ន្ធដឹកជញ្ជូន ពង្រីកឱកាសសេដ្ឋកិច្ច និងពាណិជ្ជកម្ម ជាមួយនឹងការការពារជាចាំបាច់នូវប្រព័ន្ធអេកូឡូស៊ី នៅក្នុងតំបន់អាក់ទិក ដែលងាយរងគ្រោះនេះ។

លោកបានបន្ថែមថា វាចាំបាច់ណាស់ត្រូវកែលម្អបរិស្ថានទីក្រុង ឲ្យបានជាប្រចាំ លើកកម្ពស់ដល់ការតាំងទីលំនៅ នៅតំបន់ចុងខាងជើង ហើយជាទូទៅលើកកម្ពស់គុណភាពជីវិត «ដើម្បីឲ្យពួកគេអាចមានការងារគួរឲ្យចាប់អារម្មណ៍ ល្អ ប្រាក់ខែល្អ ក៏ដូចជាការទទួលបានការអប់រំ និងសេវាថែទាំសុខភាពបែបទំនើប ធ្វើឲ្យតំបន់អាក់ទិក ពិតជាមានផាសុកភាព និងគួរឲ្យទាក់ទាញចង់ទៅរស់នៅ»។