មនុស្សរាប់សិបនាក់ ត្រូវគេរាយការណ៍ថា បានជាប់ខ្លួនក្រោមគំនរបាក់បែករបស់អគារខ្ពស់ដែលបានបាក់រលំ បន្ទាប់ពីការរញ្ជួយដីដ៏ខ្លាំងក្លា វាយប្រហារតំបន់ភាគកណ្តាលសហភាពមីយ៉ាន់ម៉ានារសៀលថ្ងៃសុក្រនេះ ។

អគារមួយខ្នងស្ថិតក្នុងសង្កាត់ Chatuchak ទីក្រុងបាងកក បានក្លាយជាគំនរបាក់បែក ក្រោយភាពរំញ័រនៅក្នុងរាជធានីរបស់ប្រទេសថៃមួយនេះ ខណៈដែលអគារជាច្រើនខ្នងទៀត បានយោលដូចទោង ។

ក្រុមនគរបាល និងក្រុមគ្រូពេទ្យបឋមថៃ និយាយថា អគារកម្ពស់ ៣០ជាន់ ដែលកំពុងស្ថិតក្រោមការសាងសង់ធ្វើជាការិយាល័យរដ្ឋាភិបាលនេះ បានបាក់រលំធ្វើឲ្យជាប់ខ្លួនកម្មករ ៤៣នាក់ ។

វិទ្យាស្ថានជាតិវេជ្ជសាស្ត្រសង្គ្រោះបន្ទាន់ថៃ និយាយនៅក្នុងសារបង្ហោះលើបណ្តាញព័ត៌មានសង្គម Facebookថា មនុស្ស ៧នាក់ បានរត់រួចខ្លួន ខណៈមនុស្ស ៤៣នាក់ផ្សេងទៀត នៅបន្តជាប់ខ្លួនក្រោមគំនរបាក់បែកអគារ ។

ចំណែកឯលោក Worapat Sukthai គឺជាអធិការរងនគរបាលសង្កាត់ Bang Sue បាននិយាយប្រាប់ទីភ្នាក់ងារព័ត៌មាន AFPថា ពេលលោកមកពិនិត្យមើលកន្លែងកើតហេតុ លោកបានឮសំឡេងស្រែកហៅឲ្យជួយ ។

មន្ទីរស្ទង់ភូគព្ភសាស្រ្តសហរដ្ឋអាមេរិក(USGS) បាននិយាយថា មាននូវការរញ្ជួយដីកម្រិត ៧,៧រ៉ិចទ័រ ហើយនិងក្នុងជម្រៅដី ១០គ.ម ហើយចំណុចកណ្តាលរបស់វា ស្ថិតនៅចម្ងាយប្រហែល ១៧គ.មពីរដ្ឋធានី Mandalay របស់មីយ៉ាន់ម៉ា ដែលមានពលរដ្ឋរស់នៅប្រហែល ១,២លាននាក់ ។

នៅមិនទាន់មានសេចក្តីរាយការណ៍ភ្លាមៗនោះទេពីយ៉ាម៉ាន់ម៉ាលើទំហំនៃការខូចខាតដោយសារការរញ្ជួយដីដ៏ខ្លាំងក្លានេះ ៕