​ថៃ៖ លោកនាយក​រដ្ឋមន្ត្រី Prayut Chan-o-cha នឹង​សម្រេច​ថា​ តើ​ប្រទេស​ថៃ​នឹង​ត្រូវ​បង្ខំ​ឱ្យ​ចូល​ទៅ​ក្នុង​ការ​បិទ​ខ្ទប់​មួយ​ផ្សេងទៀត ឬ​យ៉ាងណា ប្រសិនបើ​វីរុស Covid-19 ប​ម្លែ​ង​ខ្លួន​ថ្មី Omicron ត្រូវ​បាន​រក​ឃើញ​នៅ​ក្នុង​ប្រទេស​។​ ​ទោះបីជា​យ៉ាងណាក៏ដោយ វីរុស​ប​ម្លែ​ង​ខ្លួន​ថ្មី​នេះ​មិនទាន់​ត្រូវ​បាន​រក​ឃើញ​នៅ​ក្នុង​ប្រទេស​ថៃ​នៅ​ឡើយ​ទេ នេះ​បើ​យោង​តាម​ក្រុម​អាជ្ញាធរ​សុខាភិបាល​។​

ថ្លែង​បន្ទាប់ពី​កិច្ចប្រជុំ​គណៈរដ្ឋមន្ត្រី​កាលពី​ថ្ងៃ​អង្គារ ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​ថាមពល​លោក Supattanapong Punmeechaow បាន​និយាយ​ថា គណៈរដ្ឋមន្ត្រី​បាន​ណែនាំ​ភ្នាក់ងារ​ពាក់ព័ន្ធ​ ឱ្យ​តាមដាន​ស្ថានការណ៍​យ៉ាង​យក​ចិត្ត​ទុក​ដាក់ ខណៈ​ក្រសួងសុខាភិបាល​សាធារណៈ​នឹង​វាយតម្លៃ​ ការ​បើក​ប្រទេស​ឡើងវិញ​ក្នុង​រយៈពេល​ពីរ​សប្តាហ៍​។​ អនុរដ្ឋមន្ត្រី​ក្រសួង​សុខភាព​សាធារណៈ លោក Sathit Pitutecha បាន​ជំរុញ​ឱ្យ​សាធារណ​ជន​កុំ​ភ័យ​ស្លន់ស្លោ ដោយ​និយាយ​ថា នាយករដ្ឋមន្ត្រី​បាន​បញ្ជា​ឱ្យ​ភ្នាក់ងារ​សន្តិសុខបង្កើន​ការ​ឃ្លាំ​មើល​ព្រំដែន ដើម្បី​ការពារ​ការ​ឆ្លង​ព្រំដែន​ខុសច្បាប់ដើម្បី​ជួយ​ទប់ស្កាត់​វីរុស​នេះ​។​

​កាលពី​ថ្ងៃ​អង្គារ ​គណៈរដ្ឋមន្ត្រីបានសម្រេច​ចិត្ត​ផ្អាក​ផែនការ​របស់ CCSA ក្នុង​ការ​អនុញ្ញាត​ឱ្យ​អ្នក​ដំណើរ​អន្តរជាតិ​ធ្វើតេស្ត​អង់​ទី​ហ្សែ​ន (ATK) ជំនួស​ឱ្យ​ការ​ធ្វើ​តេស្ត RT-PCR ដើម្បី​ចូល​ប្រទេស ​ជុំវិញ​ការ​ព្រួយ​បារម្ភ​នៃការ​ឆ្លង​រាលដាល​វីរុស​ប​ម្លែ​ង​ខ្លួន​ថ្មី Omicron។​ ប្រទេសថៃ​មាន​ករណី​ឆ្លង​វីរុស​ COVID-19​ សរុប​ចំនួន ២,១១៥,៨៧២​នាក់ និង​ស្លាប់ ២០,៧៦៩​នាក់។ កាលពី​ថ្ងៃ​អង្គារ​ប្រទេស​នេះ​មាន​អ្នក​ឆ្លង​ថ្មី​ចំនួន ៤,៣០៦​នាក់ និង​ស្លាប់ ៣៧​នាក់ ហើយ​នៅ​ថ្ងៃ​ពុធ​នេះ​មាន​អ្នក​ឆ្លង​ថ្មី​ចំនួន ៤,៨៨៦នាក់​ និង​ស្លាប់​ចំនួន ៤៣​នាក់៕

អត្ថបទ៖ សុខមាន